Soǵan qaramastan, salada birqatar olqylyq oryn alyp keledi. Bıyl 26 qańtarda ótken Úkimettiń keńeıtilgen otyrysynda Memleket basshysy Qasym-Jomart Toqaev memlekettik qyzmetti sıfrlandyrý máselesinde sannan góri, sapaǵa basa kóńil aýdaryp, meılinshe joǵary suranysqa ıe qyzmet túrleriniń shynaıy paıdalanylý aıasyn keńeıtýdi tapsyrǵan edi. Osyǵan oraı, jergilikti atqarý organdarynyń málimetterin muqııat tekserip shyqqan memlekettik qyzmet isteri jónindegi oblystyq departament memlekettik qyzmet kórsetý tártibine qatysty 253 kemshilik taýyp otyr.
– Mysaly, taıaýda Qostanaı qalasynda turmystyq qatynastar bóliminiń qyzmetkerleri ózderine sharýamen kelgen azamatqa memlekettik qyzmet kórsetýden bas tartqan. Sóıte tura, onyń sebebin naqtylap túsindirmegen. Osylaısha, quzyrly organ qarapaıym turǵyndy qujatyn durystap, ózderine qaıta júginý múmkindiginen aıyryp otyr. Memlekettik qyzmet kórsetý barysynda jiberilgen osyndaı irili-usaqty keleńsizdikteri úshin byltyr 60, bıyl 3 basshyǵa qatysty ákimshilik hattama toltyryldy. Biraq máseleni jalań jazalaý jolymen ǵana sheshý múmkin emes. Sondyqtan biz qalalyq, aýdandyq ákimdikterge memlekettik qyzmet kórsetý sapasyn qoǵamdyq baqylaýdy kúsheıtý arqyly arttyrý joldaryn usynyp otyrmyz, – dedi memlekettik qyzmet isteri jónindegi oblystyq departament basshysy Ashat Eskendirov.
Oblys turǵyndarynan kóbinese HQO, densaýlyq saqtaý jáne eńbekpen qamtý salalaryna qatysty shaǵymdar jıi túsip jatady. Atalǵan departamenttiń málimeti boıynsha, bul salalarda 30-dan astam kemshilik anyqtalǵan. Onyń deni densaýlyq saqtaý mekemelerine tıesili.
– Bul – jaı ǵana qurǵaq málimetter emes, ár sıfrdyń artynda turǵyndardyń zaıa ketken ýaqyty, jelge ushqan aqshasy, tozǵan júıkesi tur. О́kinishke qaraı, memlekettik qyzmet alýdy jeńildetýge baǵyttalǵan qyrýar sharalar júzege asyrylyp jatqanyna qaramastan, azamattar shaǵymy toqtamaı tur. Mysaly, baspanalary órtenip, memleketten járdemaqy alǵysy kelgen Qostanaı qalasy men Áýlıekól aýdanynyń turǵyndary jaýapty mekemeniń talaby boıynsha ózderine kelgen shyǵyn somasy týraly baǵalaý qujatyn ázirleýge májbúr bolǵan. Bul qujatty talap etý eshbir normatıvtik-quqyqtyq aktide kórsetilmegen. Al táýelsiz baǵalaý júrgizetin oryndar bul qujat úshin memleket beretin járdemaqy mólsherine barabar nemese odan sál ǵana tómen qun suraıdy. Osyndaı keleńsizdiktiń saldarynan Úkimetten alǵan aqshasyn qymbat qujatqa shyǵyndap bosqa aramter bolǵan turǵyndar «Mundaı memlekettik kómektiń qajeti qansha?» dep oryndy keıis bildirip jatady, – dedi A.Eskendirov.
Oblystaǵy birqatar medısınalyq mekeme kólik júrgizýge quqyq beretin anyqtama alý úshin kelgenderden kóbirek paıda túsirý maqsatynda turǵyndardy bekitilgen tizimde joq qosymsha dárigerlerdiń tekserýinen ótýge májbúrlep, aqyly anyqtamanyń qunyn qasaqana qymbattatyp otyrǵan. Zań boıynsha, mundaı anyqtamany alý úshin 5 dárigerdiń: terapevt, okýlıst, otorınolarıngolog, psıhıatr jáne narkolog mamandardyń tekserýinen ótý jetkilikti. Alaıda emhanalardyń kóbi bul mamandardyń syrtynan nevropatolog, hırýrg, akýsher gınekologtardy da qosyp qoıǵan. Dáriger kóbeıgen saıyn anyqtama baǵasy da qymbattaı túsedi. Mysaly, Denısov aýdanynyń turǵyndary medısınalyq anyqtama alý úshin nebári 2 myń teńge shyǵyndasa, Fedorov aýdanynda bul anyqtamanyń baǵasy 14 612 teńgege deıin barady.
– Muny oblystaǵy qoǵamdyq uıymdardyń kómegimen anyqtap otyrmyz. Emhanalardyń bul áreketin oblys ákimi óz qadaǵalaýyna aldy. Taıaýda anyqtama baǵasy bir izge túsedi dep senemiz, – dedi departament basshysy.
Sonymen qatar, oblystyń birqatar aýdanynda esep málimetteriniń burmalanǵany anyqtalyp otyr. Memlekettik qyzmet isteri jónindegi departament teksergen mekemelerdiń teń jartysynyń statıstıkalyq málimetteri shyndyqqa janaspaıdy. Mysaly, B.Maılın aýdany ákiminiń apparaty memlekettik tirkeýge 90 neke qııý týraly sharty tirkeldi dep esep bergenimen, is júzinde 84 shart tirkelgen. Sondaı-aq, Qarasý aýdanynda zertteý jumystaryna arnalǵan jer ýchaskesin paıdalanýǵa is júzinde 49 ruqsat berilgenimen, esepte 38 dep kórsetilgen.
– Bul jergilikti ákimdikterdiń esepke salǵyrttyǵyn kórsetedi. Biz atalǵan aýdandarǵa kórsetilgen kemshilikterdi joıýǵa bir aı ýaqyt berip otyrmyz. Basty maqsatymyz – memlekettik qyzmetterdiń sapasy men qoljetimdiligin arttyrý. Osy nıetpen sońǵy jyldary úgit-nasıhat jumystaryn da kúsheıttik, – dedi A.Eskendirov.
Búginde óńir turǵyndaryna barlyǵy 374 memlekettik qyzmet kórsetilse, onyń 338-i elektrondy túrde júzege asyrylady. Munyń syrtynda, memlekettik qyzmet isteri jónindegi departament memlekettik qyzmettiń taǵy 8 túrin avtomattandyrý týraly bastama kóterip otyr. Olardyń ishinde baspana sertıfıkattaryn berý, Qazaqstan azamattaryn bıýdjet qarjysy esebinen shetelge emdelýge jiberý múmkindigin qarastyratyn qujattardy qabyldaý jáne qarastyrý, ata-ana quqyǵynan aıyrylǵandarǵa balamen kórisýge ruqsat berý sııaqty qyzmet túrleri bar.
Qostanaı oblysy
