Qazaqstan men Shvesııa Koroldiginiń shyǵarmashylyq zııaly qaýym ókilderin biriktirgen is-shara jyr alyby Jambyl Jabaev pen aqıyq aqyn Muqaǵalı Maqataevtyń álemdik ádebıet pen mádenıetke qosqan úlesin zertteý jáne olardyń ómiri men shyǵarmashylyǵynyń aspektilerin zerdeleý maqsatynda uıymdastyryldy.
Ádebı jıynǵa Qazaqstan – Shvesııa Koroldigindegi Tótenshe jáne ókiletti elshisi Sergeı Nurtaev, Shvesııadaǵy qazaqstandyq jastar qaýymdastyǵynyń ókilderi Regına Shepetıa-Larsson, Dınara Sabdenova, UǴA akademıgi Ýálıhan Qalıjanuly, Ulttyq akademııalyq kitaphana basshysy Úmithan Muńalbaeva, fılologııa ǵylymdarynyń doktory, aqyn Baýyrjan Jaqyp, fılologııa ǵylymdarynyń doktory Svetlana Ananeva qatysty.
Eki eldiń shyǵarmashylyq ıntellıgensııa ókilderiniń basyn qosqan sharanyń rýhanı hám ádebı mańyzy zor ekenin atap ótken Qazaqstan Respýblıkasynyń Shvesııa Koroldigindegi Tótenshe jáne ókiletti elshisi Sergeı Nurtaev: «Memleket basshysy Qasym-Jomart Toqaev «Táýelsizdik – bárinen qymbat» maqalasynda Naýryz merekesin toılaýda tujyrymdamalyq tásilderdiń mańyzdylyǵyna toqtaldy. Iаǵnı Naýryz qarsańyndaǵy ár is-shara halyqtyń mádenı-rýhanı úlesi úshin túrli mańyzǵa ıe bolýy kerek. Ultymyzdyń ımprovızator aqyny Jambyl Jabaev pen Muqaǵalı Maqataev qazaq rýhanııatyna orasan zor eńbek sińirdi. Búgingi jastardyń osyndaı kórnekti aqyndardyń shyǵarmashylyǵyna qyzyǵyp, qurmet kórsetip jatqanyna óte qýanyshtymyn. Sondaı-aq jas avtorlarǵa jańa tynys, jańa tabys tileımin», dedi.
Al Ýálıhan Qalıjanuly Jambyldyń jeke tulǵasyna toqtalyp, aqynnyń ulttyq brendke aınalatynyn aıtty. «Jambyl – aqyl-oıdyń alǵyry, ózgege uqsamaıtyn dara, oqshaý bet-beınesi asa zor qubylys. Ol epık aqyn, aıtys aqyny ári azamattyq óleńderdiń aqyny. Ulyny uly ǵana tanıdy: Áýezov moıyndaǵan, Seıfýllın bas ıgen, Sábıt Muqanov ardaqtaǵan, Rollan sálem salǵan. Tarıh dońǵalaǵy keri ketpeıdi. Táýelsiz Qazaqstanda Jambyl babamyz ulttyq brendke aınala beredi. Jambyl poezııasy – shynshyl poezııa. О́mirdi óleńmen órnektegen aqyn qazaq turmysynyń, qazaq qoǵamynyń ádiletsiz bolmysyn áshkerelegen óleńderi onyń atyn shyǵardy», dedi ol.
