Baıqaýdyń maqsaty – jastar arasynda salt-dástúrdi nyǵaıtý, ulttyq aspaptardy qasterleý, beıbitshilik pen dostyqty nyǵaıtý, ulttyq biregeılikti saqtaý, qorshaǵan ortaǵa janashyrlyqpen qaraýdy qalyptastyrý. Álemde bolyp jatqan pandemııaǵa qaramastan, QazUÝ stýdentteri asyǵa kútetin bul baıqaýǵa QazUÝ jastary belsene atsalysty. Baıqaýdyń ádil-qazy alqalaryna, óneri men ónegesi jarasqan jastardyń arasynan úzdigin tańdaý ońaıǵa túsken joq. Degenmen, saıystyń sharty da sol – oza shapqan júırikterdi anyqtaý.
Baıqaýdyń bas júldesin hımııa jáne hımııalyq tehnologııa fakýlteti jeńip aldy. Fakýltettiń ónerli stýdentteri «Naýryz» meıramynyń qazaq halqynyń tarıhı oqıǵalaryna oraı órbýin akterlik sheberlik, bı, vokaldyq, aspapta oryndaýshylyq ónerlerin úılestire otyryp sheber jetkize bildi.
1-oryndy ózindik kreatıvti ıdeıasymen erekshelengen mehanıka jáne matematıka fakýlteti ıelendi. Ujymnyń uıymshyldyǵy úılese qımyldaǵan bılerinen kórinip tur. Qazaqtyń kóne oıý órnekterin qaıta jańǵyrtyp, qumyralardy áshekeılep otyrǵan qyzdar men jaýyryny qaqpaqtaı jigitterdiń beldesýi «Sheberlik pen shymyrlyq» taqyrybyn tolyqtaı ashyp tur. Aıta keterlik erekshelikteri, umytylyp bara jatqan ánshilik óner – urmaly aspaptardyń súıemeldeýimen daýysty tamaqtan shyǵaryp án salý.
2-oryndy fılologııa fakýlteti jáne joǵary oqý ornyna deıingi bilim berý fakýlteti ıelendi. Stýdentter Qazaqstannyń ár aýmaǵynda bolsa da, arnaıy rekvızıtter taýyp, túrli sahnalyq kostıýmder kıip, ulttyq meıramymyzdy ulyqtaýmen qatar, estetıkalyq sulýlyqqa basymdyq bergen. Joǵary oqý ornyna deıingi bilim berý fakýlteti beınerolıkteriniń shymyldyǵyn «El bolamyn deseń – besigińdi túze» degen qanatty sózben ashyp, barmaǵynan bal tamǵan búldirshinderdiń kúıimen súısindirdi. Sonymen qatar, ulttyq taǵamdardyń qunarlylyǵy men qundylyǵyn utymdy kórsete bildi.
3-oryndy, jastardy tarıhqa taǵzym etýge, táýelsizdigimizdiń qadirin bilýge, beıbit eldiń baıtaq jerin qasterleýge nasıhattaıtyn kórsetilimderimen erekshelengen tarıh fakýlteti men fılosofııa jáne saıasattaný fakýltetiniń stýdentteri jeńip aldy.
Saıyskerlerdiń barlyq jumystary @kaznuartcentr paraqshasynda jarııalanyp, jankúıerlerdiń 5313 daýysy men 11736 pikirin jınaǵan hımııa jáne hımııalyq tehnologııalar fakýlteti «Júzden júırik, myńnan tulpar» nomınasııasyn da ıelendi. Sonymen qatar, @kaznu_kmo paraqshadaǵy daýystar men pikirler boıynsha úzdikterdi anyqtap, arnaıy syılyq tabystady. Qorytyndy nátıje boıynsha, mehanıka jáne matematıka fakýltetiniń stýdentteri «Jalyndy jastar» nomınasııasymen marapattaldy. Sondaı-aq, óner dodasyna kóktemdeı kóńilderimen, ulttyq oıyndarymyz ben salt-dástúrimizdi dáripteıtin osynaý merekeni ulyqtaýǵa úles qosqan geografııa jáne tabıǵatty paıdalaný, bıologııa jáne bıotehnologııa, halyqaralyq qatynastar, shyǵystaný fakýltetteriniń ónerli stýdentterine alǵys bildiremiz.
