О́mirden erte ketken daryndy ónerpaz qamshynyń sabyndaı ǵana qysqa ǵumyrynyń tutastaı Tobyl óńirindegi ulttyq ónerdiń damýyna arnady. Jastar saraıynda ótken eske alý keshine E.О́mirzaqov atyndaǵy oblystyq fılarmonııa ujymy men elimizdiń ár túkpirinen osy sharaǵa arnaıy kelgen meımandar, Nazymbektiń áriptesteri men ónerde júrgen qanattas zamandastary qatysty. Nazymbek Moldahmetov kózi tiri bolsa, bıyl 51 jasqa tolar edi. Sahnada sóz alǵandar marqumnyń kisilik bolmysy men uıymdastyrýshylyq, ónerpazdyq sheberligin tebirene eske alyp, artyna óshpes iz qaldyrǵan aıaýly azamattyń rýhyna taǵzym etti.
Kesh barysynda oblystyq mádenıet basqarmasynyń basshysy kópshilikke qaıratker ónerpazdyń ózi qurǵan Qostanaıdaǵy tuńǵysh qazaq ult aspaptar orkestrine Nazymbektiń esimin berý týraly bastama kóterilgenin aıtty.
«Nazymbek Moldabekuly Moldahmetov Qaıyńdy aýylynda 1970 jyly 1 sáýirde týdy. Búgin, 1 sáýir – Nazymbek Moldabekulynyń ekinshi ret ómirge kelgen kúni. О́ıtkeni búgingi kesh qaıratkerdiń máńgilik óner-ǵumyrynyń bastalǵanynyń belgisi… Naz-aǵanyń esimin ardaqtaý, umyt qaldyrmaý turǵysynda kóptegen usynys aıtyldy. Taıaýda fılarmonııa ujymymen keńes ótkizip, aqyldasa kele, ózi negizin qalaǵan qazaq ult aspaptar orkestrine esimin berý bastamasyn kóterdik. Bastamanyń quzyrly oryndardan qoldaý tabar kúni alysta emes dep oılaımyn», dedi Erlan Qalmaqov.
