«Qalanyń damý joly aıasynda, ár aýdannyń óz ortalyǵy, óz saıabaǵy, óz emhanalary, óz mektepteri bolýy qajet. Sondyqtan bolashaqta ár aýdannan «Shymkent sıtı» sekildi úlken jańa, zamanaýı shaǵyn aýdandar salamyz. Jańa qurylysqa ınvestorlardy tartý jumystaryna aýdan ákimderi de atsalysýy kerek. Halyq ortalyqqa qaraı emes, qajettisin óz aýdanynan shyqpaı-aq taba bilýi tıis», dedi qala basshysy.
Qala ákiminiń tóraǵalyǵymen ótken Investısııalyq shtab otyrysynda ınvestısııa potensıaly bar jobalardyń máselelerin sheshý jaıy qaraldy. Investorlarmen zoom platformasy arqyly baılanysqa shyqqan qala basshysy Shymkentte ınvestorlar úshin barlyq jaǵdaı jasalatynyn aıtyp ótti.
«Shymkent – ınvestısııaǵa qolaıly qala. Bizde arnaıy ekonomıkalyq aımaq pen birneshe ındýstrıaldy aımaq bar. Qosymsha jańa ındýstrıaldy aımaqtardyń qurylysy júrgizilýde. Onyń biri – «Juldyz» ındýstrıaldy aımaǵy. Munda qurylys, metallýrgııa, farmasevtıka, jıhaz ónerkásibi shoǵyrlanady. Elýden astam kásiporyn qurylady. Sonymen birge Biz jobalardy «bir tereze» qaǵıdaty boıynsha tolyq qoldap, kedendik salyqtyq rejım, tegin jer telimi, memlekettik qoldaý jáne daıyn ınfraqurylym qarastyrǵanbyz», dedi qala basshysy.
Sonymen qatar ákim qurylysy aıaqtalýǵa jaqyn AGRS-3 avtomattandyrylǵan gaz stansııasy paıdalanýǵa berilgende qala turǵyndarymen qatar kásipkerlik salasy100 paıyz sapaly kógildir otynmen, al, «Bozaryq» qosalqy stansııasy iske qosylǵanda elektr qýatyna qol jetkizetinin atap ótti.
Búginde Shymkent qalasynda 2021-2025 jyldarǵa arnalǵan quny 3 trıllıon teńge shamasynda bolatyn 210 jobadan turatyn pýl quryldy. Bul jobalarmen 14 myńnan astam jańa jumys orny qurylatyn bolady. Aldaǵy bes jylda júzege asatyn jobalardyń 99 ónerkásip salasy bolsa, 25-i aýyl sharýashylyǵy baǵytynda. Budan bólek, bilim salasynda 20, densaýlyq boıynsha 9, saýda boıynsha 15, týrızm salasynda 8, turǵyn úı qurylysy boıynsha 31 jáne kólik jáne kommýnaldyq qyzmetter aıasynda 3 ıvestjoba bar.
Shtab otyrysyn qorytyndylaǵan Murat Áıtenov ınvestısııalyq kelisimder jasasý jóninde sheshimder qabyldaýdyń negizgi ortalyǵy – Investısııalyq shtab bolatynyn jetkizdi. Jáne shtab otyrysynda kóterilgen másele, hattamaǵa engizilip, onyń oryndalýy jiti baqylaýǵa alynýy tıis dedi.
