Oblys ákimi О́mirzaq Shókeev aýdandy úsh jyl basqarǵan Jamantaı Beısenbaevty qurmetpen zeınet demalysyna shyǵaryp salyp, aýdannyń ósip-órkendeýine, halyqtyń ál-aýqatynyń artýyna aıanbaı eńbek etkeni úshin alǵysyn aıtty.
«Jetisaı aýdany erekshe aýdan. Eń iri aýdan. Osy aýdannyń damýyna úlken úles qosyp, kóptegen jańa bastamalarǵa muryndyq bolǵan Jamantaı Qanaıulyn qurmet demalysyna shyǵaryp sala otyryp, adal atqarǵan eńbegi úshin alǵys bildiremiz. Jańa basshyǵa mańyzdy mindetter júktelip otyr. Arys apaty kezinde ózin isker, batyl basshy ekenin kórsetti. Alda atqarylar ister kóp. Jańa óndiris oryndaryn ashýdy, aýdan turǵyndaryn jumyspen qamtý ári qaraı júzege asyrý qajet. Aýyl sharýashylyǵyn ozyq tehnologııalarmen jabdyqtap, ınvestısııa tartý kerek. Qoǵamdyq jáne quqyqtyq tártipti saqtaı otyryp, aýdan turǵyndaryna barynsha qolaıly jaǵdaı jasaýdy tapsyramyn», dedi oblys ákimi.
2018 jyly jańadan qurylǵan Jetisaı aýdanyn basqaryp kelgen Jamantaı Beısenbaev aýdan aktıviniń aldynda sóz aldy. Aýdannyń damý kórsetkishterine toqtalyp, rızashylyǵyn bildirdi. Jańa ákimdi aýdan aktıvine arnaıy tanystyrǵan О́mirzaq Estaıuly onyń aldaǵy jumysyna sáttilik tileı otyryp, abyroıly eńbek etetinine senim bildirdi.
Oblys ákimi aýdannyń jańa basshysynyń aldyna óńirdiń áleýmettik-ekonomıkalyq damýy, qoǵamdaǵy birlik pen kelisimdi nyǵaıtý boıynsha birqatar mindetter júktep otyr. Murat Qadyrbek ózine senim artqan barsha azamattarǵa alǵys aıtyp, Jetisaı aýdanynyń damýy men órkendeýi jolynda bar kúsh-jigerin jumsaıtynyn jetkizdi.
Aıta keteıik, Murat Bolatuly 1980 jyly Shardara aýdanynda týǵan. Bilimi joǵary, zańger, quqyqtaný magıstri. Qazaqstan Respýblıkasy Prezıdenti janyndaǵy Memlekettik basqarý akademııasynyń túlegi.
Eńbek jolyn 2002 jyly Qaraǵandy qalasy Qazybek bı aýdanynyń prokýratýrasynyń bólim prokýrory laýazymynda bastaǵan.
2004-2008 jyldary Qazybek bı aýdany prokýrorynyń kómekshisi, Shyǵys Qazaqstan oblysy № 2 Tarbaǵataı aýdandyq sotynyń sýdıasy laýazymdaryn atqarǵan.
2008-2011 jyldary Qazaqstan Respýblıkasy Qorshaǵan ortany qorǵaý mınıstrliginde bıýdjettik josparlaý, qarjy-ekonomıkalyq qamtamasyz etý jáne memlekettik aktıvterdi basqarý, ekonomıka jáne qarjy departamenttteri dırektorynyń orynbasary, Almaty oblysy Eńbekshiqazaq aýdany ákiminiń orynbasary retinde eńbek etken.
2011-2016 jyldary QR Memlekettik qyzmet isteri agenttiginiń Memlekettik qyzmetti kadrlyq qamtamasyz etý departamenti dırektorynyń orynbasary, Almaty oblysy boıynsha departament basshysynyń orynbasary, Soltústik Qazaqstan jáne Mańǵystaý oblysy boıynsha departamentteri basshysy – tártiptik keńes tóraǵasy, QR Memlekettik qyzmet isteri mınıstrligi Mańǵystaý oblysy boıynsha departamentiniń basshysy – ádep jónindegi keńes tóraǵasy laýazymdaryn atqarǵan.
2016 jyldan beri Arys qalasynyń ákimi qyzmetin atqardy.
