Respýblıkalyq gazetterdiń úzdik bestigine «Egemen Qazaqstan», «Kazahstanskaıa pravda», «Polısııa KZ», «Qazaqstan temirjolshysy» jáne «Uıǵyr avazı» basylymdary kirdi. Aımaqtyq kóshbasshylar arasynda «Jetisý», «Aqtóbe», «Ońtústik Qazaqstan», «Aq Jol», «Ortalyq Qazaqstan» gazetteri bar.
El boıynsha barlyǵy 170 respýblıkalyq jáne 543 aımaqtyq gazet jazylym boıynsha taratylady. Jazylýdyń jalpy kólemindegi respýblıkalyq basylymdardyń úlesi 44%, óńirlik basylymdardyń úlesi 54% qurady. Tırajdyń 2%-y halyqaralyq merzimdi basylymdarǵa tıesili. Qazaqstandyqtar «Qazposhta» AQ arqyly elimizdiń jáne Reseı, Belarýs, Ýkraına memleketteriniń 3 myńnan astam gazet-jýrnaldaryna jazylý múmkindigine ıe.
Gazetter men jýrnaldarǵa jazylý aýyldarda kóp tirkelgen. Jazylýdyń jalpy kóleminde onyń úlesi 71% quraıdy. Aýyl turǵyndary oblystyq, qalalyq jáne aýdandyq basylymdarǵa jazylǵandy (jalpy tırajdyń 58%-y) jón kóredi.
Jazylý boıynsha Qazaqstannyń óńirleri arasynda Almaty, Aqtóbe, Qaraǵandy jáne Jambyl oblystary kósh bastap tur.
«2020 jyldyń qorytyndysy boıynsha jazylýdyń jalpy kólemi 90,3 mln danany qurady. Bıylǵy jyldyń ekinshi jartyjyldyǵyna jazylý 5 sáýir kúni bastaldy. Jyl sońynda kórsetkishter 25-30% ósedi, biraq tutastaı alǵanda ótken jyldyń kórsetkishinen aspaıdy. Biz elektrondy basylymdarǵa kóshý – jalpy álemdik trend ekenin túsinemiz. Ony qazaqstandyq statıstıka da rastaıdy», dedi «Qazposhta» AQ «Poshtalyq servıs» fılıaly dırektory Nurjan Jabaev.
Qazirdiń ózinde 2021 jyldyń ekinshi jartyjyldyǵyna jazylý bastalyp ketti. Barlyq nıet bildirgen turǵyndarǵa respýblıkalyq jáne aımaqtyq basylymdarǵa 25 maýsymǵa deıin, sheteldik gazet-jýrnalǵa 10 maýsymǵa deıin jazylýǵa múmkindik bar. Merzimdi baspasózge jazylýdy kez kelgen «Qazposhta» AQ bólimshesinde resimdeýge bolady.
