- О́ńirimizde koronavırýs indetiniń taralýy kúnnen kúnge ýshyǵyp barady. Halyqtyń sanyna shaqsaq, bizdiń oblys elimiz boıynsha birinshi orynǵa shyǵyp ketti, - degen bolatyn Batys Qazaqstan oblysynyń ákimi Ǵalı Esqalıev dúısenbi kúni ótken shtab májilisinde. Ákimniń aıtýynsha, oblys ortalyǵyndaǵy stasıonarlyq ortalyqtardyń josparly oryndary 90%-ǵa tolǵan. Sondyqtan tez arada kúsheıtilgen shekteý sharalaryn qabyldamasa, ótken jazdaǵy ahýal qaıtalanýy múmkin.
Búginge deıin oblys turǵyndarynan 15677 adam indet juqtyrsa, onyń 12547-si jazylyp shyqqan. Alaıda 247 adamnyń ajaly osy vırýstan kelipti. Ásirese naýryz aıynda qaıtys bolǵandar sany aqpan aıynan eki esege jýyq kóp.
Osyndaı qaýipti jaǵdaıǵa qaramastan kópshilik sharalar – toı-tomalaq ótkizýshiler azaımaı otyrǵanyn aıtqan bas sanıtar dáriger Muhamǵalı Aryspaev mundaı toıdy uıymdastyrýshylarǵa ǵana emes, qatysýshylarǵa da aıyppul salýdy usynǵan bolatyn. Qazirdiń ózinde karantın talabyn buzyp, toıǵa barǵan 80-deı adamnyń árqaısysy 83 myń teńge aıyppulǵa tartylǵany habarlandy.
Sáýirdiń 6-sy kúni shyqqan jańa qaýlyda oblystyń bas sanıtar dárigeri tún mezgilinde halyqtyń kóshege shyǵýyna tıym saldy. Iаǵnı túngi 00.00.-06.00. aralyǵynda quqyq qyzmetkerleri, jedel járdem, qutqarýshylar sekildi arnaıy qyzmet ókilderi ǵana shekteýsiz júre alady. Osy kezeńde dárigerge, dárihanaǵa baratyn nemese túngi aýysymda isteıtin turǵyndar «109» telefony boıynsha ótinim qaldyrýy nemese http/www.STOPCOVID.KZ. saıtyna tirkelýi tıis.
Kontıngenti 300 oqýshyǵa deıingi aýyl mektepterinde synyptaǵy bala sanyn 15 adamnan asyrmaı dástúrli formatta oqytýǵa bolady.
Saýda úıleri men ortalyqtary jumys kúnderi saǵat 10.00-den 21.00-ge deıin, senbi kúni saǵat 10.00-den 17.00-ge deıin qyzmet kórsetip, jeksenbide jabylady. Bul shekteýler 9 sáýirde kúshine enbek.
