«Qaıyrymdy ister marafony» jalpyulttyq jobasynyń qatysýshylary qaıyrymdy ister úlken nemese kishkene dep bólinbeıtinin aıtady.
О́tken aptada marafon aıasynda kóptegen salany qamtyǵan 600-den astam is-shara ótti. Mysaly, eń belsendi aımaqtardyń biri – Pavlodar oblysynda «Sen jalǵyz emessiń» qoǵamdyq qorynyń eriktileri «Pavlodar oblysynyń hospısine» 900 000 teńgeniń materıaldyq kómegin kórsetti. Jergilikti AHAT bóliminiń qyzmetkerleri «Sábıler úıiniń» balalaryna kómektesse, Pavlodar qalasynyń Álııa esimdi turǵyny úı-kúısiz janýarlarǵa azyq-túlik satyp alyp, olardyń ekpesine aqsha aýdardy.
Sondaı-aq Pavlodarda áleýmettik front-ofıs iske qosyldy. Onda árbir adam áleýmettik qoldaý máseleleri boıynsha tegin keńester alady. Al Aqsý qalasynda múmkindigi shekteýli adamdarǵa arnalǵan sadaq atý úıirmesi ashyldy. Pavlodar oblystyq «Jasyl El» shtabynyń komandıri Rýsana Samekova qaıyrymdy isterdi jarııa etý kerek dep sanaıdy.
«Árıne, bireýdiń ómirin túbegeıli ózgertý qıyn. Biraq ony durys jaqqa baǵyttaýǵa bolady. Biz árqashan jumysymyzdy áleýmettik jelilerde jarııalaımyz. Bálkim, kórgen adamdardyń biri qatarymyzǵa qosylyp, kómekteskisi keletin shyǵar. «Jaqsylyq juqpaly deıdi emes pe», deıdi Rýsana.
Kóptegen jyldar boıy «Jasyl El» qoldaýǵa muqtaj jandarǵa kómektesip, qorshaǵan ortany qorǵaýǵa kúsh salyp keledi. Bıyl ózderiniń on jetinshi eńbek maýsymyn qaıyrymdy ister marafonymen ashyp otyr.
«Bizdiń eriktiler jalǵyzilikti qart adamdardyń aýlasyn qar men muzdan tazartýǵa, úı tazalaýǵa kómektesedi. Qarttar alǵysyn aıtyp, batasyn beredi. Bul bizdiń jigitterdi odan da jaqsy ister jasaýǵa shabyttandyrady», dedi ol.
Kókshetaý qalasyndaǵy «Meıirimdi júrek Lider.kz» qoǵamdyq qorynyń basshysy Irına Katýhovanyń aıtýynsha, ózi de bala kezinde muqtajdyqty kóp kórgen.
«Men adamdarǵa kómektese bastaǵan sebebim, bala kezimde úıimizde isherge as tappaı qalatyn kezder bolatyn. Ol kezde mundaı uıymdar bolǵan joq. Sondyqtan men adamdarǵa jylý men súıispenshilik syılaıtyn top qurýdy uıǵardym. Bizge qarapaıym adamdar kóp kómektesedi. Eriktilik – bul bolmys. Úlken júrekti jáne meıirimdi adam ǵana erikti bola alady. О́ıtkeni ol úshin bizge jalaqy da, syıaqy da tólenbeıdi», deıdi top jetekshisi.
Ár apta saıyn qoǵamdyq qordyń eriktileri turǵylyqty baspanasy joq adamdarǵa ystyq tamaq taratady. Muqtaj adamdarǵa kıim-keshek jınaıtyn qoımanyń jumysyna kómektesedi. Sonymen qatar olar jalǵyzbasty zeınetkerlerge kómek kórsetetin jelini iske qosty. Qor basshysy qaıyrymdylyq úlken nemese kishkene ister dep bólinbeıtinin, shyn júrekten istelgen kez kelgen qaıyrymdylyq mańyzdy ekenin aıtady.
«Eń bastysy, qaıyrymdylyq shyn júrekten shyqsa boldy. Búgin bastasańyz da bolady, bir ájege nan satyp ákelip berip, qoqysyn shyǵarýǵa kómektesińiz. Mańaıyńyzǵa úlgi kórsete bilińiz. Bir-birimizdi sál de bolsa baqytty etý óz qolymyzda ekenin eldiń esine salyńyz», deıdi Irına Katýhova.
Jambyl oblysynda «Ahyska» túrik etnomádenı ortalyǵynyń qyzmetkerleri 2,5 mıllıon teńge jınap, Taraz meshitine medısınalyq maska, antıseptık pen parasetamol aparyp berdi. Al Qyzylorda óńirinde Shıeli aýdany ákimdiginiń bastamasymen, «Gezhuba Shieli Cement Company» JShS qoldaýymen áleýmettik qoldaýǵa muqtaj 60-qa jýyq otbasy 900 000 teńge kóleminde azyq-túlik kómegin aldy. Atyraý oblysynda marafonǵa qatardaǵy azamattar da úles qosyp jatyr. Saraıshyq aýdanynda Mahambet aýylynyń belsendileri óz esebinen 3 balalar alańyn ornatty.
Qyzylorda oblysynyń «Volonterlar front ofısiniń» basshysy Bolatbek Aıtbenbetov Qazaqstanda volonterlyq qozǵalys, ásirese, jastar arasynda belsendi damyp kele jatqanyn aıtady.
«Bıyl bizdiń qatarymyzdy ótken jyly ózimiz kómek kórsetken balalardyń tolyqtyratyny qatty qýantady. Qazir elimizde epıdemıologııalyq ahýal qıyn. Sondyqtan men muqtaj adamdarǵa qoldaý kórsetý – bizdiń mindetimiz dep sanaımyn», – deıdi ol.
Batys Qazaqstan oblysynda ótken aptada «Qaıyrymdy ister marafonyna» eki myńnan astam adam qatysty. Judyryqtaı jumyla bilgen qaıyrymdy jandar 600 adamǵa kómek kórsetti. Máselen, Jańaqala aýdanyndaǵy Jańaqala aýylynyń turǵyny Salamat Sertekov Qyrqopa aýylyndaǵy 30 otbasyǵa azyq-túlik aparyp berdi. Kaztalov aýdanynyń máslıhat depýtaty Qýanysh Ermekov bir otbasyna úı, ekinshisine jıhaz syılady. Al Aqsaı qalasynda Bórli aýdanynyń jastarmen jumys jónindegi resýrstyq ortalyǵynyń jetekshisi Rýslan Azamatov lotereıa uıymdastyryp, turǵyndar men jergilikti kásipkerlerden Emırdi emdeýge 1 900 000 teńge jınap berdi. Qazir balanyń jaǵdaıy birqalypty. Otbasymen birge Reseıde ıne salǵyzyp qaıtý úshin saparǵa daıyndalyp jatyr.
«Meniń oıymsha, ózgege kómek qolyn sozǵan ár adam avtomatty túrde eriktige aınalady. Árıne, men óz is-áreketimdi jarnamalaǵym kelmeıdi. Biraq bul basqalardyń bizge qosylýy úshin qajet. Álemde jaqsy adamdar bar degen úmittiń úzilmeýi úshin basqalarǵa baqyt syılaýymyz kerek. Múmkin bizdiń búgingi qoldaýymyz bolashaqta ózgelerdiń de muqtaj adamdarǵa kómektesýine túrtki bolatyn shyǵar», deıdi Rýslan Azamatov.
Eske sala keteıik, «Qaıyrymdy ister marafony» jalpyulttyq jobasy bıyl aqpan aıynda Memleket basshysy Qasym-Jomart Toqaevtyń bastamasymen Qazaqstan Táýelsizdiginiń 30 jyldyǵyn merekeleý aıasynda bastalǵan bolatyn. Jobanyń eń mańyzdy mindetteriniń biri – qaıyrymdy azamattar men uıymdardy biriktirý jáne bolashaqta qoǵam men adamdardyń ómirin durys jaǵyna ózgertýge múmkindik beretin jomarttyq pen meıirimdilik ıdeıasyna negizdelgen qoǵamdy birlesip qurý. Marafonǵa kez kelgen adam qatysa alady. Ol úshin jasaǵan qaıyrymdy isterin áleýmettik jelide #QAIYRYMDYISTERMARAFONY #MARAFONDOBRYHDEL resmı heshtegtermen bólisýi kerek.
