Jekeshelendirý jyldary ǵımaraty satylyp, qyzmetkerleri de jan-jaqqa tarap ketip, ataýynan basqa eshteńesi qalmaǵan kásiporynnyń aıaqtan turýy úshin qolda bar múmkindikter iske asyrylyp jatyr. Aqtóbe qalasynyń ortasynan ǵımarat jalǵa alynyp, zamanaýı jabdyqtar satyp alýǵa «Damý» kásipkerlikti qoldaý qory óńirlik fılıalynyń kepildendirýimen nesıe alyndy. Búginde fabrıkaǵa irikteý negizinde 50 tiginshi jumysqa qabyldanyp, alǵashqy ónimderi satylymǵa shyǵaryla bastady.
Sehta tigilgen jeıdeler, fýtbolkalar men balalardyń jazdyq kıimderi qaladaǵy «Fiesta», «Arzan», «Shygys» bazarynda, «Dına» gıpermarketinde satylymda tur. Jumysyn bastaǵanyna bir aı da tolmaǵan tigin fabrıkasynyń ishki rynoktaǵy jeńil ónerkásip taýarlarynyń arasynan óz ornyn tabýy ońaıǵa túspeıtinin kásipkerler jasyrmaıdy. Máselen, Qytaı, Túrkııa, Qyrǵyzstannyń jeńil ónerkásip ónimderiniń Aqtóbe oblysyndaǵy ımporty jyl saıyn 10 mıllıon AQSh dollaryn quraıdy. Aqtóbe oblysynyń toqyma jáne tigin ónerkásibiniń ishki rynoktaǵy bolar-bolmas úlesi ateleler túrindegi shaǵyn sehtarmen ǵana shektelgen. Sońǵy kezderi Túrkimenstannyń toqyma óndirisiniń buıymdary men О́zbekstan taýarlary da kóptep túsip jatyr.
Toqyma, tigin buıymdarynyń óndirisi jumyssyzdyqty azaıtýdyń eń negizgi joly bolyp sanalady. Osy sala jandansa, tiginshilik kásippen turaqty tabys tabatyn qyz-kelinshekterdiń úlesi de joǵarylaıdy. Sonyń bir mysaly, kásipkerlik negizderin oqyp, kıim tigýde tájirıbe jınaqtaǵan 50 tiginshi men kıim pishýshiniń irikteý negizinde tigin fabrıkasyna jumysqa ornalasqany. Taýar aınalymy artyp, jumys kólemi kóbeıse taǵy da júzdegen adamǵa jumys taýyp beremiz dep ýáde etip otyr fabrıka basshylyǵy. Aldaǵy ýaqytta jumysqa dızaıner mamandyǵyna oqyp jatqan kolledj stýdentteri qabyldanady dep josparlanǵan. Matalardy irikteý, kıimderdi taratý-satý jelilerine de qyzmetkerler kerek.
Elimizdiń ishki rynogyn kóp jyldardan beri jaýlap alǵan Qytaı, О́zbekstan, Qyrǵyzstan taýarlaryn satyp alýǵa ózimizden qanshama qarjynyń ketip jatqany óte ókinishti. Kórshilerimiz jeńil ónerkásiptiń osy salasyn áldeqashan ekonomıkalarynyń qozǵaýshy kúshterine aınaldyryp aldy. Máselen, Qyrǵyzstan men О́zbekstanda barlyq turǵyndardyń 20%-y osy salada eńbek etedi. Qazirgi jaǵdaıda elimizdegi toqyma jáne tigin óndirisi shaǵyn sehtardyń irilenýi jáne tikeleı memlekettik baǵdarlamalardyń qoldaýy arqyly ǵana aıaqtan tura alady.
