Dúbirli dodada Nur-Sultan qalasynyń komandasy birinshi lıgada el chempıony atandy.
Elimizdiń barlyq óńirinen úzdik kókparshylar qatysqan jarysta bizdiń shabandozdar 4 kezdesý ótkizip tórteýinde de aıqyn basymdyqpen jeńiske jetti. 30 naýryzda Mańǵystaý oblysynyń sportshylarymen ótken oıynda sportshylarymyz 6:3 esebimen utsa, kelesi kúni Aqtóbe oblysy kókparshylarymen bolǵan kezdesý 8:2 esebimen bizdiń jigitterdiń paıdasyna sheshildi.
Shymkent qalasynyń kókparshylaryn da 10:2 esebimen oısyrata jeńdi. Al 4 sáýir kúni quramanyń kezekti qarsylasy Pavlodar qalasynyń quramasy oıynan bas tartyp, jeńis bizdiń sportshylardyń enshisinde qaldy. Aqtyq synda Qaraǵandy oblysyn 7:2 esebimen utyp, elorda kókpar quramasy birinshi lıga chempıondary atandy.
«Sportshylardyń daıyndyǵy jáne jylqylardy daıyndaý turǵysynan úlken jumys júrgizildi. Ońtústik pen soltútsik aımaqtyń arasyndaǵy klımattyq aıyrmashylyqqa qaramastan, ońtústikte oqý-jattyǵý jıyndary ótkizildi. Jylqylar beıimdele aldy, sportshylar fızıkalyq turǵydan daıyn boldy, sondyqtan oıyn jaqsy ótti. Jigitter qorǵanysta da, jekpe-jekte de baryn saldy. Ary qaraıǵy basty maqsatymyz – joǵary lıgadaǵy úzdik úshtikke ený», dedi «Nur-Sultan» kókpar klýbynyń dırektory Donııar Ibraev.
Elorda komandasynyń sapynda Qazbek Amangeldınov, Nurbolat Qartqojaq, Asqar Ońǵarbaev, Azamat Hasenov, Abaı Erejep, Jaqsylyq Amalbekov, Eldos Tilebaldıev, Meıirjan Mátjan, Vladırmır Kıl, Alıjan Qattabosynov, Arslan Qabjanov, Eljas Esengeldi syndy shabandozdar óner kórsetti.
