Memleket basshysy Qasym-Jomart Toqaev 2025 jylǵa qaraı óńirlerdegi eldi mekenderdi sport nysandarymen tolyqtaı qamtamasyz etip, keminde halyqtyń 35%-y buqaralyq sportpen shuǵyldanatyndaı deńgeıge jetkizý mindetin tapsyrǵan bolatyn. Sporttyq ınfraqurylymdy damytý maqsatynda boı kótergen jańa nysannyń ashylýy el táýelsizdiginiń 30 jyldyǵy men Lısakov qalasynyń 50 jyldyǵyna oraılas kelip otyr.
Tennıs ortalyǵynyń ashylý rásimine qala turǵyndary, sport ardagerleri, oblystyq sport basqarmasynyń ókilderi men óńirge belgili jattyqtyrýshylar, sondaı-aq jas sportshylardyń ata-analary qatysty. Saltanatty jıynda sóz alyp, turǵyndardy quttyqtaǵan qala ákimi Almat Ismaǵulov jańa sport kesheni jastardy sportqa yntalandyrýǵa, buqaralyq-kópshilik sporttyń damýyna, qala turǵyndarynyń sportqa degen qulshynysyn arttyrýǵa, jastardyń bos ýaqyttaryn tıimdi uıymdastyrýǵa, túptep kelgende, salamatty qoǵam qalyptastyrýǵa úlken serpin beretinin, odan qaldy qala jastaryn tennıs sportyna baýlyp, halyqaralyq arenalarda el namysyn qorǵaıtyn sańlaq sportshylardy daıarlaýǵa múmkindik beretinin atap ótti.
Jańa nysan kásibı sportshylardy daıarlaıtyn zamanaýı ortalyq qana emes, qala turǵyndary turaqty jattyǵyp, densaýlyǵyn shynyqtyratyn sport alańyna aınalmaq. Qala basshysy sporttyq ınfraqurylymdy damytý halyq tilegimen sabaqtasyp jatqan Prezıdent Joldaýynyń basym baǵyttarynyń biri ekenine toqtaldy.
– Bıyl búkil el bolyp Táýelsizdigimizdiń 30 jyldyǵyn atap ótkeli otyrmyz. Búginde bizdi búkil álem kemel bolashaqqa nyq qadam basyp, qaryshtap damyp kele jatqan myqty memleket, sporttyń san alýan túri damyǵan qýatty el dep tanıdy. Táýelsizdigimizdiń mereıtoıy Lısakov qalasynyń 50 jyldyǵymen tuspa-tus kelip otyr. Jarty ǵasyrlyq belesti baǵyndyrǵan kenshiler qalasy sońǵy shırek ǵasyr kóleminde qarqyndy damyp keledi. Shaharymyz kúnnen kúnge kórkeıip, jańa nysandar boı kóterip jatyr. Búgin esigin aıqara ashqan qalamyzdaǵy tuńǵysh tennıs ortalyǵy osynyń dáleli. Lısakovta qazirgi tańda 99 sport ǵımaraty bar. Qalanyń barlyq shaǵyn aýdandarynda, Oktıabr kentinde jáne Krasnogor aýylynda tartan tóselgen 14 ámbebap ashyq sport alańy, shaǵyn fýtbol, basketbol, voleıbol oınaýǵa arnalǵan jasandy kógaldar bar. Bul sport alańdaryna qalanyń kez kelgen turǵyny erkin kirip, qalaýynsha sportpen shuǵyldana alady. Jańa paıdalanýǵa berilgen tennıs ortalyǵynan zor úmit kútemiz. Búgin bul ortalyqtyń tabaldyryǵyn alǵash attaǵan balǵyndar erteń berisi oblys, árisi respýblıkaǵa, tipti álemge tanymal tennısshi bolyp shyqpasyna kim kepil? Búgingi kúnnen bastap qala turǵyndaryna jaıly korttarda tennıs oınap, ýaqyt ótkizýge múmkindik bar. Elbasy Joldaýynda buqaralyq sportty damytýǵa kóńil bólý kerektigi basa aıtylǵan. Bul nysan sol tapsyrmany júzege asyrý baǵytynda oryndalyp jatqan kóp jumystyń biri ǵana, – dedi Almat Erikuly.
Bıyl sondaı-aq tennıs ortalyǵyna japsarlas aýmaqty abattandyryp, ol jerge múmkindigi shekteýlilerge arnalǵan dene shynyqtyrý ortalyǵyn salý josparda bar eken. Bul joba paralımpıadashy Alekseı Lıpýtın tarapynan túsken usynystan keıin qolǵa alyna bastapty. Aldaǵy ýaqytta bul aýmaqta 12 kásibı trenajer ornatylyp, sákiler, oryndyqtar qoıylady. Sondaı-aq, alańǵa jumsaq tartan jabyndysy tóselip, mańaıyna aǵash kóshetteri otyrǵyzylmaq. Jobany júzege asyrýǵa 30,5 mln teńgege jýyq qarajat qarastyrylyp qoıǵan.
Saltanatty shara barysynda tennıs jattyqtyrýshysy Konstantın Modogorov pen Lısakov qalalyq balalar jáne jasóspirimder mektebiniń jattyqtyrýshy-oqytýshysy Pavel Salamaha jańa nysannyń tusaýyn kesken soń, kópshiliktiń qýanyshy kóbeısin degen nıetpen shashý shashyldy. Odan keıin sport nysanynyń ashylý rásimine Qostanaı qalasynan arnaıy kelgen oblystyq dene shynyqtyrý jáne sport basqarmasy basshysynyń orynbasary Elena Kıreeva men sport sheberi, prezıdenttik kópsaıys jáne shańǵy jarysynan 2021 jylǵy Qazaqstan chempıony Nıkolaı Hrıpýnov quttyqtaý tilekterin jetkizdi.
– Biz búgingideı Lısakov turǵyndary úshin mańyzy zor oqıǵanyń kýási bolǵanymyzǵa qýanyshtymyz. Jańa sport ortalyǵynda kásibı sportshylar ǵana jattyǵyp qoımaıdy, bul – qala turǵyndarynyń bárine ortaq buqaralyq keshen. Qutty bolsyn! – dedi Nıkolaı Hrıpýnov.
Qala turǵyndary asyǵa kútken tennıs ortalyǵy ashyq dep jarııalanǵan soń sharaǵa qatysýshylar estelik sýretke túsip, bir-birin quttyqtap, izgi tilekterin arnap jatty. Al oblys ortalyǵynan kelgen sport mamandary jabyq korttaǵy jas sportshylardyń oıynyn syrttaı tamashalap kórip, keıin úlken tennıs oınaýdan sheberlik sabaqtaryn ótkizdi. Jattyqtyrýshylar balalarǵa raketkany qalaı ustap, qalaı silteý kerektigin, dopty oıynǵa qosý ádisterin, kortta ózin-ózi qalaı ustaý kerek ekendigin túsindirdi.
– Balalar búgin kortqa alǵash ret shyǵyp, dop uryp kórdi, qýanyshtarynda shek joq. Sóz joq, bul tennıs ortalyǵy zamanaýı úlgide salynǵan. Keshen barlyq halyqaralyq standartqa saı keledi. Mundaǵy jattyǵý sabaqtary tegin júretin bolady. Ortalyqtyń mindeti – eń birinshi kezekte, balalardy bes jastan bastap oqytý jáne respýblıkalyq týrnırlerge qatysatyn qala quramasyn qalyptastyrý. Biz respýblıkalyq tennıs federasııasynyń basshylyǵymen sóılestik. Lısakov – tennıs ortalyǵyn salǵan alǵashqy monoqala ekenin maqtan tutamyz. Sportqa qyzyǵýshy balalar men olardyń ata-analary dán rıza. Biz buǵan deıin de osy sport túrinen oń kórsetkishter kórsetip kelgen edik. Endi odan da jaqsy nátıje kórsetemiz degen úmittemiz, – deıdi Lısakov qalalyq balalar jáne jasóspirimder mektebiniń jattyqtyrýshysy Pavel Salamaha.
Jergilikti tennıs mektebi tárbıelenýshileriniń qýanyshty ekenderi aıtpasa da túsinikti. Buǵan deıin tennıs talaptaryna saı kele qoımaıtyn sport nysandarynda jattyǵý ótkizip kelgen balalar men jasóspirimder endi úr jańa jabyq keshendegi qalypty temperatýrada, jumsaq tósenish ústinde jattyǵatyn bolady.
Atalǵan sport kesheniniń qurylysyna 312 mln teńgeniń ústinde qarjy jumsaldy. Tennıs ortalyǵy qalalyq stadıonnyń janynda ornalasqan. Zamanaýı eki qabatty keshende eki jabyq kort, kórermenge arnalǵan trıbýna bar. Jobanyń jalpy aýdany – 2 myń 16 sharshy metr bolady.
Jańa sport kesheninde kásibı jáne áýesqoı tennıspen aınalysý úshin barlyq jaǵdaı jasalǵan: eki alańy bar, jattyǵý zaly, kúzet jáne beınebaqylaý bólmesi, medısınalyq kabınet, jattyqtyrýshylar bólmesi, serverlik, jeke jylý pýnkti bar. Uldar men qyzdarǵa arnalǵan kıim aýystyratyn jeke bólmeler men ondaǵy sanıtarlyq talaptardyń saqtalý jaıy da qarastyrylǵan. Munan bólek, kelýshilerge arnalǵan kútý zaly taǵy bar. О́tken jyly tennıs ortalyǵyna qajetti jıhaz, sport jabdyqtary, eden jýý mashınasy satyp alynypty.
Shaǵyn qalada oblystyq, respýblıkalyq jarystarda joǵary kórsetkishterge jetken sportshylar az emes. Máselen, A.Ismaǵulova byltyr sport sheberi normatıvin oryndap, jasóspirimder arasyndaǵy respýblıkalyq birinshiliktiń kúmis júldegeri atandy. Al Leonıd jáne Valerıı Papertnyılar eresekter arasynda oblystyq, respýblıkalyq jeke jáne juptyq saıystarda júldeli oryndardan kórinip júr.
Tennıs ortalyǵynyń ashylǵanyna, ásirese, bala kezinen úlken tennıspen aınalysyp kele jatqan 17 jastaǵy Lısakov turǵyny Dámir Turlybekov aıryqsha qýanyshty. Búginde oblystyń birneshe dúrkin jeńimpazy, respýblıka chempıony atanyp úlgergen jas sportshy endi halyqaralyq jarystarda top jarýdy kózdeıdi.
– Qazirgi tennıs korty ashylyp oınaýǵa óte qolaıly. Sebebi burynǵy oıyn-jattyǵý zalymyz tar boldy, standartqa saı kelmeıtin ári edeni taqtaı edi. Qazirgi tennıs korty barlyq talaptarǵa jaýap bere alady, jabyndysy da kásibı deńgeıde tóselgen. Jańa ortalyqty burynǵy zalmen salystyrýǵa bolmaıdy. Arasy jer men kókteı. Barlyq jaǵdaı jasalǵan. Endi osy jerde únemi daıyndalyp, ózimniń sheberligimdi odan ári de shyńdaı túsemin, – dedi D.Turlybekov.
Qaladaǵy áýesqoı sportshylar aldyn ala kelisilgen keste boıynsha tennıs ortalyǵyna tegin kirip, ózderine berilgen ýaqyt aralyǵynda jattyǵý ótkize alady. Al úlken tennıs oınap kórgisi keletin eresek turǵyndar ózderimen birge torly taıaqtary men doptaryn ala kelýi kerek.
Qostanaı oblysy,
Lısakov qalasy
