О́ner • 09 Sáýir, 2021

Eýropa sheberleriniń qoltańbasy

382 ret

kórsetildi

2 mın

oqý úshin

Á.Qasteev atyndaǵy Memlekettik óner mýzeıiniń jınaqtamasynan (gravıýra jáne ofort) alynǵan týyndylar kórermendi álemdik mádenıettiń jaýhar muralarymen tanystyrady. Mýzeı qabyrǵasynda saltanat qurǵan «XVI-XVII ǵasyrlardaǵy Eýropa grafıkasy» dep atalǵan kórmeden álem tanyǵan sýret sańlaqtarynyń qoltańbasyn tamashalaýdyń taptyrmas múmkindigi týyp otyr.

Arman OKTIаBR

Ekspozısııaǵa Germanııa, Fransııa jáne Nıderland sýretshileri Albreht Dıýrer, Jak Kallo, Rembrandt Van Reın, Antonı Vaterlo, Iаn Lıvens syndy belgili qylqalam sheberleriniń 100-den astam týyndysy qoıylǵan. Jahandyq álemdi qurý jolyndaǵy betburys kezeńi dep atalǵan XVI-XVII ǵasyr álemdik tarıhtyń mańyzdy kezeńi sanalady. Dál sol kezeńnen bastap grafıkanyń ofort dep atalatyn túri baspa grafıkasynyń tanymdyq, ǵylymı jáne dinı mazmundaǵy sýretterin taratatyn yńǵaıly ári arzan qural retinde qoldanyla bastady.

Kórmege fransýz grafıka mektebiniń XVII ǵasyrdaǵy kórnekti ókili, óziniń zamandas sýretshilerine, olardyń arasynda áıgili Rembrandtqa eleýli yqpal jasaǵan Jak Kallonyń (1592-1635) týyndylary qoıyldy. Kallonyń «Soǵystyń kishi apattary» (1632) jáne «Soǵystyń úlken apattary» (1634) toptamalary fransýz áskeriniń onyń kindik qany tamǵan Lotarıngııasyn basyp alǵan kezdegi qaıǵyly kórinisinen týǵan. Onyń kompozısııalarynan zorlyq-zombylyq pen soǵysqa degen narazylyq úni estiledi.

Ekspozısııanyń negizgi bóligin kartınalary álemdik beıneleý ónerinde úzdik túpnusqa sanalatyn áıgili golland sýretshisi Rembrandt Van Reınniń (1606-1669) týyndylarynan jasalǵan oforttar alady. Mýzeıge áıgili orys kolleksıoneri ári sýretshisi N.Mosolovtyń (1847-1914) kolleksııasynan túsken bul grafıkalyq týyndylar uly sheber jaýharlarynyń erekshelikterin jetkizýde oryndaý sheberligimen jáne asqan dáldigimen dara tur. Eksponattardyń arasynan Rembrandtyń «Kıeli otbasy» (1645), «Túngi baqylaý» (1642), «Adasqan uldyń oralýy», «Danaıa» syndy belgili kartınalarynyń oforttaryn kórýge bolady. Ásirese, osy kórmege qoıylǵan týyndylardyń ishinen Rembrandtyń «leıden» kezeńinde oryndalǵan «Qaıyrshy» (1630) kompozısııasy erekshe qyzyqtyrady. «Adamnyń syrtqy kelbetin túzetýge qanaǵattanbaıtyn, biraq onyń ishki jaǵdaıyn anyqtaýǵa tyrysatyn» (E.Levıtın) Rembrandttyń kólemi shaǵyn oforty týyndygerdiń sýretker retinde joǵary sheberligin kórsetedi.

Kórermen úshin uly golland sýretshisiniń shyǵarmashylyǵyna arnalǵan ár jyldardaǵy sırek kitap basylymdary da kórmeden oryn alǵan. Ekspozısııanyń atalǵan bólimimen – Á.Qasteev atyndaǵy Memlekettik óner mýzeıiniń kitaphana qoryndaǵy biregeı jınaqtama aıasynda da tanysýǵa bolady.