Úkimet basshysyna qalany gazdandyrý jáne sýmen jabdyqtaý, týrıstik ınfraqurylymdy damytý, sondaı-aq Baıqońyr qalasynda «Baıqońyr» AEA qurý jumystarynyń júrgizilý barysy týraly baıandaldy.
«Soıýz MS-18» basqarylatyn korabliniń ushyrylýyn jáne onyń Halyqaralyq ǵarysh stansııasymen túıisýin birlesip baqylaǵannan keıin Úkimet basshysy «Roskosmos» ǵarysh qyzmeti memlekettik korporasııasynyń bas dırektory Dmıtrıı Rogozınmen ǵarysh salasyndaǵy Qazaqstan-Reseı yntymaqtastyǵynyń ózekti máselelerin talqylady.
Premer-Mınıstr adamnyń ǵaryshqa alǵash ushýynyń 60 jyldyǵyna arnalǵan konferensııanyń plenarlyq otyrysyna qatysty.
Úkimet basshysy QR Prezıdenti Qasym-Jomart Toqaevtyń sharaǵa qatysýshylarǵa arnaǵan sózin oqyp berdi.
«Mine, 65 jyl boıy álemdegi eń iri ǵarysh aılaǵy bolyp kelgen Baıqońyr ǵarysh aılaǵynan 150 ǵaryshker keń baıtaq ǵalamdy ıgerdi. Olardyń qatarynda qazaqstandyq ǵaryshkerler Toqtar Áýbákirov, Talǵat Musabaev jáne Aıdyn Aıymbetov bar. Qazaqstan men Reseıdiń odan ári belsendi jáne jemisti yntymaqtastyǵy ǵaryshtyq zertteýler men basqarylatyn ushýlar salasyndaǵy birlesken jobalar men baǵdarlamalardy iske asyrýǵa yqpal etetinine senimdimin», — dedi A. Mamın.
Konferensııanyń plenarlyq otyrysyna «Roskosmos» memlekettik korporasııasynyń basshysy Dmıtrıı Rogozın, QR sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, NASA ákimshisiniń orynbasary Kennet Baýersoks, qazaqstandyq ǵaryshkerler Toqtar Áýbákirov, Talǵat Musabaev, Aıdyn Aıymbetov jáne Muhtar Aımahanov, «One Web» jáne «SES Networks» spýtnıktik operatorlarynyń basshylyǵy jáne t.b. qatysty.
