Saýda jáne ıntegrasııa mınıstri Baqyt Sultanovtyń aıtýynsha, 2021 jyldyń basynan beri respýblıkada áleýmettik mańyzy bar azyq-túlik ónimderiniń baǵasy 3,2%-ǵa ósti. Bul rette 2020 jyldyń sáıkes kezeńimen salystyrǵanda ósim 4,8%-dy ǵana quraǵan. Al sonyń ishinde karantındik dúrlikpe saldarynan naýryz aıynda 4,1 paıyzdy kórsetti.
Sonymen qatar keı óńirlerde áli kúnge deıin joǵary ósim baıqalady. Atap aıtqanda, eń kóp ósim Jambyl oblysynda – 4,2%-ǵa jáne Atyraý oblysynda – 3,8%-ǵa artqan. Osyǵan baılanysty Saýda jáne ıntegrasııa mınıstrliginiń basshysy baǵanyń barynsha ósýine jol bergen ákimderdiń jetekshilik etetin orynbasarlaryna tártiptik sharalar qoldanýdy usyndy.
Premer-mınıstrdiń birinshi orynbasary Álıhan Smaıylov Atyraý men Jambyl oblystarynda áleýmettik mańyzy bar azyq-túlik baǵasy qymbattap ketkenin aıtyp, óńir basshylarynyń jaýapty orynbasarlaryna qatań sógis berýdi surady. Osy oraıda Úkimet basshysy birinshi vıse-premerdiń usynysyn qoldady.
«Birinshi toqsanda áleýmettik mańyzy bar azyq-túlik taýarlarynyń ósýiniń eń joǵarǵy deńgeıi Atyraý jáne Jambyl oblystarynda tirkeldi. Osyǵan baılanysty, osy jumysqa jaýapty Atyraý oblysy ákiminiń orynbasary Qaırat Esqabyluly Nurlybaevqa jáne Jambyl oblysynyń ákiminiń orynbasary Berik Bolatuly Nyǵmashevqa qatań sógis berýdi tıisti oblys ákimderine tapsyrýdy suraımyn», dedi Álıhan Smaıylov Úkimet basshysyna.
