Elbasy Nursultan Nazarbaev pen Prezıdent Qasym-Jomart Toqaev únemi óz Joldaýlarynda buqaralyq sportqa erekshe kóńil bólý kerektigin únemi aıtyp keledi.
Máselen, Memleket basshysy ótken jylǵy Qazaqstan halqyna Joldaýynda: «Halyqtyń densaýlyǵyn jaqsartý máselesi aıryqsha nazar aýdarýdy talap etedi. Barlyq jastaǵy el azamattary arasynda buqaralyq sportty damytý mańyzdy. Sport ınfraqurylymdarynyń balalar úshin barynsha qoljetimdi bolýyn qamtamasyz etý kerek. Buqaralyq dene shynyqtyrýdy órkendetý isi jańa chempıondar shyńyna shyǵatyn pıramıdaǵa aınalýy tıis. Bul salaýatty ári belsendi jastardyń, túptep kelgende, qýatty ulttyń negizin qalyptastyrady», dep atap ótken edi.
Prezıdenttiń bul tapsyrmasyn negizge ala otyryp Shymkent qalasy ákimdigi naýryz aıynyn bastap mektep oqýshylary arasynda buqaralyq sporttan «Shymkent jastar lıgasy» jobasy qolǵa aldy. Maqsat – mektep oqýshylarynyń bos ýaqytyn tıimdi paıdalanyp, sportpen shuǵyldaný arqyly olardyń erik pen tabandylyǵyn qalyptastyrý jáne Qazaqstan Respýblıkasynyń chempıonattaryna komanda jasaqtaý.
Joba eki kezeńge bólinip uıymdastyrylady. Alǵashqy kezeńde, ıaǵnı naýryz-mamyr aralyǵyna josparlanǵan saıystarǵa jalpy bilim berý mekemeleriniń oqýshylary, al II-kezeńde joǵary jáne orta arnaýly oqý oryndarynyń sportshylary synǵa túsedi. Bul kezeń qyrqúıek jáne qarasha aılarynda ótedi.
Búgingi tańda mektep komandalary arasynda jerebe tastalyp oıyn kestesi túzilip, soǵan sáıkes komandalar ózara kil myqtyny anyqtap jatyr.
Jalpy atalǵan jobaǵa qatysýǵa Shymkent qalasy boıynsha 4 sport túrinen 140 mektepten 536 komanda (8 569 jas) ótinim bergen. Olar sporttyń fýtbol (uldar arasynda), basketbol (uldar arasynda), voleıbol (qyzdar arasynda) jáne shahmat (uldar, qyzdar arasynda) túrinen saıysqa túsýde.
Erejege sáıkes, ár aýdanda aýdan aralyq aınalym boıynsha oıyn oınatylady.
Aýdannan 4 komanda shırek fınalǵa joldama alady. Shırek fınalǵa shyqqan jeńimpaz komandalar shyǵyp, odan jeńgen komanda fınalǵa joldama alady. Al jarystyń qorytyndysy boıynsha sport túrlerinen I, II, III oryn alǵan komandalar dıplom, medal jáne baǵaly syılyqtarmen marapattalady.
Sonymen qatar, sport túrlerinen «Úzdik qaqpashy», «Úzdik qorǵaýshy», «Úzdik oıynshy», «Úzdik jetekshi», «Úzdik jankúıer», «Úzdik fan-klýby» «Úzdik tárbıeshi», «Úzdik bilim berý mekemesi» nomınasııalarynyń jeńimpazdaryna dıplomdar men baǵaly syılyqtar tabystalady.
Qazirgi kúni «Basketbol» boıynsha 8 komanda (№23, 33, 42, 1, 29, 45, 8 jáne №2 «Daryn» mektepteri), «Voleıbol» boıynsha 4 komanda (№89, 131, 68, 113 mektepteri) fınalǵa joldama aldy.
