Qasym-Jomart Toqaev shved dıplomatyna iltıpat bildirip, onyń elimizge jasaǵan sapary EQYU-nyń qazirgi tóraǵasy retinde de, Shvesııanyń syrtqy saıası vedomstvosynyń basshysy turǵysynan da óte mańyzdy ekenin atap ótti.
– Qazaqstan Eýropadaǵy qaýipsizdik jáne yntymaqtastyq uıymynyń qaǵıdattary men qundylyqtaryna beıil ekenin aıtqym keledi. Siz basqaryp otyrǵan Uıymmen aradaǵy yntymaqtastyq – syrtqy saıasattaǵy basymdyqtarymyzdyń biri. Biz atalǵan Uıymmen de, oǵan múshe memlekettermen de aradaǵy tyǵyz yqpaldastyqty nyǵaıta túsýge daıynbyz, – dedi Qasym-Jomart Toqaev.
Memleket basshysy 2010 jyly Astanada ótken EQYU-nyń tarıhı sammıtiniń qorytyndylary Uıymnyń damýyna tyń serpin bergenin jáne onyń asa mańyzdy ekenin atap ótti.
Prezıdent ekijaqty baılanystardyń perspektıvalaryn talqylaý barysynda Qazaqstannyń Shvesııamen aradaǵy ózara yqpaldastyqty ekonomıkalyq jáne gýmanıtarlyq salalarǵa basa mán bere otyryp, odan ári nyǵaıtýdy kózdeıtinine toqtaldy.
О́z kezeginde Ann Lınde Qasym-Jomart Toqaevqa qonaqjaılyq kórsetkeni úshin alǵys bildirip, EQYU-nyń qazirgi tóraǵasy retindegi osy saparynyń ózi úshin mańyzdy ekenin jetkizdi.
– EQYU men Qazaqstan arasyndaǵy qarym-qatynastarǵa zor mán beretinimizdi atap ótkim keledi, – dedi Shvesııanyń Syrtqy ister mınıstri.
Ann Lınde Qasym-Jomart Toqaevqa EQYU-nyń qazirgi tóraǵasy laýazymyndaǵy óz jumysynyń alǵashqy qorytyndylary, aldaǵy jumystary, onyń ishinde, Ortalyq Azııa baǵytyndaǵy jumys josparlary týraly málimet berdi.
Áńgimelesý barysynda Vankýverden Vladıvostokqa deıingi Eýropa men Eýrazııanyń aýqymdy keńistigindegi qaýipsizdiktiń syn-qaterleri men táýekelderi talqylandy. Sonymen qatar EQYU-nyń aldynda turǵan áskerı-saıası, ekonomıkalyq-ekologııalyq jáne adamzattyq sııaqty úsh ólshemdegi mindetti júzege asyrý joldary boıynsha pikir almasty.
