QazaqGeography RQB basqarma tóraǵasy Orman Nurbaevtyń aıtýynsha, Qazaqstannyń ulttyq saıabaqtaryna barýdy tańdaǵan týrıster sanynyń jyl saıyn artyp kele jatqanyna qaramastan, saıabaq ınfraqurylymyn damytý jáne oǵan ınvestısııalar tartý qajet. Alaıda ınvestısııalardyń uzaq merzimdi qaıtarymy jáne ekologııalyq týrızmdi damytýǵa ınvestısııalardy qoldaý tetikteriniń bolmaýy kommersııalyq ınvestorlardyń qyzyǵýshylyǵyn tómendetedi.
«Ekologııalyq týrızmdi damytýdaǵy QazaqGeography-diń jınaqtalǵan segiz jyldyq tájirıbesin jáne bıologııalyq alýan túrlilikti saqtaý boıynsha ǵylymı-zertteý jumystaryn eskere otyryp, birlestik basshylyǵy seriktestermen keliskennen keıin, ulttyq saıabaqtardaǵy keıbir jer telimderin uzaq merzimdi basqarý konkýrsyna qatysýǵa sheshim qabyldady. QazaqGeography komandasy osy saıabaqtardy damytýǵa jáne bolashaq urpaq úshin erekshe qorǵalatyn tabıǵı aýmaqtardyń baılyǵy men alýan túrliligin saqtaýǵa bar kúsh-jigerin salady», dedi ol.
Qazir saıabaqtardyń aýmaǵynda qorshaǵan ortaǵa áserdi baǵalaý (QOÁB) prosedýrasy júrgizilýde, bul 3 kezeńde ótedi. Ártúrli ǵylymı ınstıtýttardyń mamandary (botanıkter, zoologtar, topyraq zertteýshiler, geologter, geograftar, gıdrologter jáne t.b.), onyń ishinde Geografııa jáne sý qaýipsizdigi ınstıtýtynyń ujymdary – relef, geologııa, bolýy múmkin qaýipti tabıǵı qubylystar jáne t.b. bólimderi jáne Bıoalýantúrlilikti saqtaý jónindegi Qazaqstan qaýymdastyǵynyń ósimdikter men janýarlar dúnıesi, bıoalýantúrlilik, antropogendik faktorlardyń áseri jáne t.b. bólimderiniń mamandary atalǵan aýmaqtardaǵy zertteý jumystaryn bastady. Jumys barysynda josparlanǵan is-sharalardyń nusqalaryn iske asyrý kezinde qorshaǵan orta men áleýmettik-ekonomıkalyq ortadaǵy ózgeristerge taldaý jasalady. Qorshaǵan ortaǵa áserdi baǵalaý nátıjeleri boıynsha qoǵamnyń keń aýqymyn tarta otyryp, qoǵamdyq tyńdaýlar ótkiziledi. Eki parkke arnalǵan bul rásim Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetimen kelisilgen.
Aıta ketý kerek, «Sharyn» jáne «Altyn-Emel» memlekettik ulttyq tabıǵı parkteri QazaqGeography RQB-nyń basqarýyna berilmegen jáne memleket menshiginde qala beredi. QazaqGeography týrıstik-rekreasııalyq nysandar salý úshin ulttyq parktiń tek belgilengen jer telimderin uzaq merzimdi paıdalaný quqyǵyn aldy.
«Sharyn» memlekettik ǵylymı-óndiristik kásipornynyń jalpy aýdany – 127 050 ga, berilgen jer ýchaskeleriniń aýdany 4,9 ga quraıdy, al salynatyn nysandardyń negizgi kólemi «Sharyn» memlekettik ulttyq tabıǵı parkiniń aýmaǵyna kireberistiń aldynda ornalasqan. Sol sııaqty «Altyn-Emel» memlekettik ǵylymı-óndiristik kásipornynyń jalpy aýdany 307 myń ga shamasynda, al berilgen jer ýchaskeleriniń aýdany – 12,1 ga. Josparlanǵan nysandardy salýǵa ruqsattar zańnamada belgilengen barlyq rásimderden ótkennen keıin, qoǵamdyq tyńdaýlar men qorshaǵan ortaǵa áseri týraly saraptamalyq qorytyndylardy alǵanda ǵana beriledi. Bul týraly mindetti túrde habarlanady. Belgilengen prosedýralar kezinde tujyrymdamasy, qurylystyń ýaqyty jáne obektilerdiń josparlanǵan ótelýi, onyń qorshaǵan ortaǵa áseri, jergilikti turǵyndar úshin ashylǵan jumys oryndary sany, salyq jáne basqa tıisti aqparat pen qujattar usynylady.
Uzaq merzimdi paıdalaný quqyǵynyń berilýi park aýmaǵyna kirý nemese saıahattaý úshin tólenetin kunynyń ulǵaıýyna áserin tıgizbeıdi. Josparlanǵan týrıstik-saýyqtyrý oryndaryna barý jáne olardy paıdalaný saıabaqqa kelýshilerdiń qalaýy boıynsha ǵana bolady. Týrıstik-rekreasııalyq obektilerdi salýǵa tartylǵan ınvestısııalarǵa respýblıkalyq jáne jergilikti bıýdjetterden qarajat paıdalanylmaıdy, barlyq qarajat kózi – jeke ınvestısııalar. Osy obektilerdi paıdalanýdan túsken kirister QazaqGeography RQB bıologııalyq alýantúrlilikti saqtaý jáne Qazaqstandaǵy ekologııalyq týrızmdi damytý salalarynda zertteýler júrgizý úshin jumsalady.
Aıta ketelik, QazaqGeography respýblıkalyq qoǵamdyq birlestigi 2013 jyly 16 qazanda quryldy. QazaqGeography birlestiginiń maqsaty – geografııa jáne onymen baılanysty ǵylymdardy zertteý jáne tanymal etý; ǵylymdy, bilimdi jáne qorshaǵan ortany qorǵaýdy nasıhattaý; qorshaǵan ortany qorǵaý sharalaryna qatysý; Qazaqstannyń tabıǵı, tarıhı jáne mádenı muralaryn tanymal etý; Qazaqstandaǵy týrızmdi damytý úshin elimizdiń biregeı tarıhı-mádenı jáne geografııalyq nysandaryna nazar aýdartý. Qazirgi ýaqytta birlestiktiń 11 aımaqtyq ókildigi ashylǵan.
