– Qandaı da bir oqıǵaǵa baǵa berý úshin aldymen ýaqyt qajet. Elimizdi shyrmaǵan indettiń bastalǵanyna da bir jyldan asty. Sodan beri halqymyz koronavırýs synaǵyna taısalmaı tótep berip keledi. Osyndaı qıyn shaqta
teatr ujymy da qarap otyrmady, birneshe ret qoldanýǵa bolatyn qorǵanysh maskasyn tigýdi bastap, alǵashqylardyń biri retinde elorda turǵyndaryna kómek qolyn sozdy. Balet ártisteri men vokalıster Mádenıet jáne sport mınıstrligi jasalǵan jobalarǵa, dálirek aıtqanda mınıstr Aqtoty Raıymqulovanyń bastamasymen júzege asqan « Karantındegi juldyz» telejobasyna qatysty. Qatań karantın jeńildetilgennen keıin teatr aıtýly premeralardy qoıyp, barsha kórermenge syı jasady, − dep atap ótti «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.
Al «Astana Opera» opera trýppasynyń basshysy, Qazaqstannyń eńbek sińirgen qaıratkeri Azamat Jyltyrkózov kúsheıtilgen karantın kezinde onlaın-jobalar kórermenderdi ǵana emes, sonymen birge oryndaýshylardy da qutqaryp qalǵanyn, ásirese ónerpazdardyń shyǵarmashylyǵyn shyńdaýǵa áseri bolǵandyǵyn aıtty.
Sondaı-aq Talǵat Musabaev, Medet Chotabaev, Jupar Ǵabdýllına, Jannat Baqtaı, Saltanat Ahmetova, Evgenıı Chaınıkov, Baǵdat Ábilhanov sekildi talantty ónerpazdar teatrdyń júregi sahna ekendigin aıta kelip, karantın jeńildetilgennen «Don Paskýale», «Mahabbat sýsyny», «Dala úni» qoıylymdarynyń premeralary, kóptegen jańa konsert pen sımfonııalyq baǵdarlama ártister men kórermenderdiń júregine úmit otyn jaqqandyǵyn jetkizdi.
Bir jaǵynan karantın balet ártisterine de ońaı tımedi, olar úshin daıyndyqsyz ótkizgen bir kúnniń ózi jumyssyz eki aptaǵa para-par deýge bolady.
– Dene qımyl-qozǵalystyń joqtyǵyn birden sezedi, úı jaǵdaıynda jasalǵan jattyǵý zaldaǵy tolyqqandy sabaqty almastyra almaıdy. Daǵdyǵa aınalǵan jumys tártibimizge birden kirisip ketý ońaı bolmady. Sondyqtan spektaklderde óner kórsetý, tipti kórermenderdiń shekteýli sanyna premeralar qoıý múmkindigi bolǵanǵa qýandyq. Balet ártisiniń shyǵarmashylyq ǵumyry qysqa, sol sebepti biz úshin ár kúnimiz ben saǵatymyz asa mańyzdy. Eńbegimizdiń ereksheligin túsinip, zeınetke erte shyǵý jasyn qaıtarǵany úshin mınıstrligimizdiń basshylaryna alǵysym sheksiz, endi tólemder alý úshin 20 jyl jumys isteý jetkilikti, – deıdi «Astana Operanyń» jetekshi solısi, Qazaqstannyń eńbek sińirgen qaıratkeri Baqtııar Adamjan.
Sonymen birge bekzat óner ordasynyń mýzykatanýshysy Marjan Jákenovanyń aıtýynsha, Mádenıet jáne sport mınıstrligi Nur-Sultan qalasy ákimdigimen birlesip iske asyrǵan «Teatr sabaǵy», sondaı-aq balalar úıiniń tárbıelenýshilerine arnalǵan birqatar qaıyrymdylyq aksııa men konserttik jobanyń mańyzy da zor.
