Fılıal tóraǵasy, Batys Qazaqstan oblysynyń ákimi Ǵalı Esqalıevtiń tóraǵalyǵymen ótken otyrysta «Nur Otan» partııasy Batys Qazaqstan oblystyq fılıalynyń konferensııasyn shaqyrý jáne saılaýaldy baǵdarlama baǵyttary boıynsha partııanyń oblystyq fılıaly tóraǵalaryn, qoǵamdyq keńesterdiń quramdaryn bekitý týraly máseleler qaralǵan.
Otyrys sheshimi boıynsha partııa oblystyq fılıaldyń XXVII esep-berý saılaý konferensııasy 13 mamyrda ótetin boldy.
Kún tártibindegi ekinshi másele – Elbasy, Partııa kóshbasshysy Nursultan Nazarbaevtyń tapsyrmasymen ár óńir, qala jáne aýdan úshin «Nur Otan» partııasynyń 217 saılaýaldy baǵdarlamasyn iske asyrý boıynsha egjeı-tegjeıli jol kartalary bekitilip, oǵan jaýapty depýtattar men oryndaýshylar belgilendi. Jyldarǵa jáne naqty is-sharalarǵa bólingen 80 myńnan astam ındıkatorǵa qol jetkizý kózdelgen.
«Nur Otan» partııasy oblystyq fılıal tóraǵasynyń aıtýynsha, oblysta barlyq deńgeıdegi depýtattardyń tóraǵalyǵymen 12 qoǵamdyq keńes qurylyp, olardyń quramyna barlyq deńgeıdegi máslıhat depýtattary, óńirdiń zııaly qaýym ókilderi, partııanyń belsendi músheleri, praımerızge qatysýshylar kirgen.
