Kóp qabatty turǵyn úıge suranys kóbeıdi

Qaladaǵy «Asar», «Turan» sha­ǵyn aýdandarynda jáne Arǵynbekov kóshe­siniń boıynda kóp qabatty turǵyn úıler boı kóterýde. Baspa­nalardyń qurylysyn birqatar iri kompanııa júrgizip jatyr. Sala mamandarynyń aıtýynsha, birinshi kezekte sapaǵa mán berilip, qurylys jumystaryn ýaqtyly aıaqtaý mejelengen.

Shymkentte memlekettik baǵdar­lama arqyly salynǵan sý jańa páterlerdi berýde birinshi kezekte kóp balaly otbasylarǵa basymdyq berilýde. Kúni keshe 100-den astam kóp balaly otbasy baspanaly bolyp, qonys toıyn toılady. Turǵyn úı basqarmasynyń basshysy Azamat Rysjanovtyń aıtýynsha, 2021 jyl­ǵy I toqsannyń qorytyndysy bo­ıynsha 2 796 (ár aıda 932) azamat turǵyn úı kezegine tirkeldi. Shymkent qalasy boıynsha turǵyn úı alý tiziminde 43 906 azamat bar.

Osy jyldyń basynda 976 otbasyny jalǵa beriletin pátermen qamtý josparlanǵan bolatyn. Búgingi tańda jumys isteıtin jastarǵa 300 páter boıynsha turǵyn úı komıs­sııasynyń sheshimi qabyldanyp, páter­lerdiń kiltteri berilip jatyr. 1 sáýirde 161 páter boıynsha turǵyn úı ko­mıssııasynyń sheshimi shyqty. Bul rette jetim balalarǵa 10 páter, kóp­ balaly otbasylarǵa 106 páter, halyqtyń áleýmettik jaǵynan álsiz tobyna 45 páter beriledi. Komıs­sııanyń kelesi otyrysy mamyr aıynda ótedi dep kútilýde.

2021 jyldyń sońyna deıin kezekte turǵan azamattardy baspanamen qamtamasyz etý úshin 1 580 páter satyp alý josparlanǵan. Páter satyp alýǵa 22,5 mlrd teńge qarjy bólindi. Naryqtaǵy jeke qurylys salýshylardyń tizimi anyqtalyp, taldaý jumystary júrgizilýde.

Jyl sońyna deıin kredıttik negizde 4 197 otbasyny pátermen qamtý kózdelýde. 2021 jyly mamyr aıynda jergilikti bıýdjet esebinen bastapqy jarna úshin 300 mln teńgege deıin (ár azamatqa 1 mln teńgege deıin) turǵyn úı sertıfıkattaryn berý josparlanǵan.

Sonymen qatar 2021 jyly jer­gilikti bıýdjet esebinen bólingen 6 mln teńgege «Turǵyn úı sertıfı­kat­taryn berý» memlekettik kór­se­tiletin qyzmeti avtomattandy­ryl­dy. Bul qyzmet boıynsha azamat­tar­dyń qujattaryn qabyldaý – aqparat­tyq júıeniń www.kezekte.kz saıty arqyly júzege asyrylatyn bolady. Bul rette turǵyn úılerdi úlestirý tek zań aıasynda, elektrondy kezekpen júzege aspaq.

Aıta keterligi, shaharda jergi­likti qurylys kompanııalary da kóp­ qabatty turǵyn úı salý ju­mys­taryna belsene atsalysýda. «Ońtústik Qurylys Servıs» JShS – óńirdegi sapaly turǵyn úı salý­men aınalysatyn kompanııa. Jýyr­da atalǵan kompanııanyń shahar ortalyǵynda turǵyzǵan «Baqyt» turǵyn úı kesheni el ıgiligine berildi.

Qurylys jumystary 2018 jyly bastalyp, nysan eki kezeńmen aıaqtalǵan. Alǵashqy úıler 2020 jyldyń naýryz aıynda tapsyrylsa, ekinshi kezek osy joly júzege asqan. Jalpy alǵanda, 40 myńnan astam sharshy metr turǵyn jaı paıdalanýǵa be­rildi. Mundaı joba bıyldyń ózin­de qalanyń tórt jerinde júzege asyp jatyr. Kóp qabatty úıde 2-3 ból­meli bıznes klastaǵy páterler bar.

«Bul keshen quramaly karkas tásilimen soǵylǵan. Úıge qajetti qural­dar «Ońtústik Qury­lys Servıs» JShS-niń zaýytynda ja­sal­­ǵan. Birin­shi kezeńde páterlerdi tolyq bi­ti­rip sattyq. Ekinshi kezeńde árleý ju­mystaryn páter ıesine qal­dyr­­dyq. Úıdiń syrty tabıǵı tas – tra­­ver­tınmen qaptalǵan. Jeke kó­lik­­terge parkıng bar», deıdi Ońtús­tik Qurylys Servıs» JShS qarjy dırektory Gúljan Sydyqova.

Páterler 66-118 sharshy metr­den. Ár kireberiste lıft bar. Tur­ǵyn­dardyń jeke kólikterine arna­ıy parkıng jasalǵan. Bul páter­lerdiń 70 paıyzyn Turǵyn úı jı­naq bankiniń salymshylary aldy. Salymshylar qurylys jumystary bastalmaı turyp nesıe rásimdegen. Osy arqyly baspanaǵa naryqtyq baǵadan tómen baǵamen qol jetkizgen.

«Otbasy banktiń» Shymkent qala­lyq fılıaly dırektorynyń orynbasary Nurlan Sultanovtyń aıtýynsha, zamanaýı úlgidegi kóp qabatty úıdiń qurylys jumystary aıaq­talmaı jatyp páterler satylyp ketken. Demek, qalada sapaly kóp ­qa­batty turǵyn úılerge degen suranys arta túsýde degen sóz.

Aıta keterligi, shymkenttik qurylys kompanııalarynan bólek, Bazis-A, Highvill, BI Group syndy jetekshi kompanııalar da Shymkent naryǵyna ene bastady. Árıne bul óz kezeginde qaladaǵy páter tap­shy­lyǵyn azaıtýǵa, ekinshiden, tur­ǵyn úılerdiń sapasyn kóterýge múm­kindik bermek.

ShYMKENT