Sport • 19 Sáýir, 2021

Kásipqoı boks: IBF-tiń reıtıngi jarııalandy

27 ret kórsetildi

Halyqaralyq boks federasııasynyń (IBF) jańartylǵan reıtınginde Qazaqstannyń birneshe bylǵary qolǵap sheberi úzdik ondyqtyń qataryna enip otyr, dep habarlaıdy Egemen.kz.

Eń úzdik nátıje orta salmaqta kúsh synasyp júrgen Gennadıı Golovkınge tıesili ekeni anyq. Sebebi, dańqty otandasymyz bul kúnderi IBF nusqasy boıynsha chempıondyq belbeýdi ıelenýde. Dál sol salmaqtaǵy Jánibek Álimhanuly men Meıirim Nursultanov 9 jáne 10 oryndardy enshileýde. Olarǵa qaraǵanda Aıdos Erbosynulynyń kóshi áldeqaıda ilgeri. Birnshi orta salmaqta óner kórsetetin qandasymyz tórtinshi satyǵa taban tirep tur. Aıdos 17 sáýirde Germanııanyń Karlsrýe qalasynda ótken jarysta reseılik Evgenıı Shvedenkomen judyryqtasýǵa tıis edi. Alaıda qazaq boksshysynyń koronavırýs dertine shaldyǵýyna baılanysty bul jekpe-jek keıinge shegerildi. Sondaı-aq, «TOP-10» sańlaqtyń qatarynda Danııar Eleýsinov pen Batyr Júkembaev ta bar. Olar óz salmaqtarynda segizinshi orynǵa taban tiredi. 

Bir aıta keterligi, joǵaryda esimderi atalǵan qazaq jigitteriniń birde-bireýi áli jeńilistiń kermek dámin tatqan emes. Eger aldaǵy ýaqytta osy baǵyttarynan jańylmaı, qarsy kelgenderin qoǵadaı japyrsa, onda olardyń da álemdik táj úshin talasýyna tamasha múmkindik týyndaıdy.         

Sońǵy jańalyqtar

Uqsas jańalyqtar