Qylqalamǵa qushtar quraqtaı órenderdi bir alańda qaýyshtyrǵan kórme Almaty qalasyndaǵy 20-dan astam balalar shyǵarmashylyǵyn damytý jáne beıneleý óner ortalyqtary shákirtteriniń sýret jáne sándik-qoldanbaly óner janryndaǵy tańdaýly jumystaryn qamtyǵan.
Atalǵan shara jasóspirim sýretshilerge elimizdiń tarıhy men mádenıetin tanystyrýǵa, týǵan jeriniń ulttyq qundylyqtary, dástúrleri men sulýlyǵy týraly túsinikterin keńeıtýge jol ashyp, óner álemine degen súıispenshilikterin oıatqany daýsyz. Jas sýretshiler óz jumystarynda qorshaǵan álemge, eldiń ótkeni, búgini jáne bolashaǵy týraly óz kózqarastaryn bildirýge tyrysqan. Olar Qazaqstannyń tarıhy, mádenıeti, tabıǵatymen baılanysty túrli aspektiler men sıýjetterdi beıneleıdi. Kórkem peızajdarda adam portretteri jáne natıýrmorttar, qala kósheleri men táýelsiz memleketimizdiń rámizderi bala qııalyn qanattandyra túsken.
О́nerge ińkár óskinderdiń ıdeıalary men shyǵarmashylyq nıetterin kórsetetin avtorlyq týyndylar ártúrli tehnıkada oryndalǵan. Aıtalyq, kórme qabyrǵasynan keskindeme, akvarel, sándik-qoldanbaly óner – gobelender, keste tigý, applıkasııalar, qýyrshaqtar, maskalar syndy túrli janrdaǵy týyndylardy kezdestirýge bolady. Sýretten bólek, sheberler gravıýralardy, plastılınnen, sazdan, gıpsten jasalǵan músindik kompozısııalardy, sýretpen bezendirilgen keramıkadan, matadan, aǵashtan jasalǵan buıymdardy bederlegen.
– О́ner ortalyqtarynyń ustazdary balalardyń shyǵarmashylyq daǵdylaryn damytýǵa zor úles qosqandyǵy munda kelgen órenderdiń qabiletinen baıqalyp tur. Balalardyń qoltańbasy óte kórkem, ashyq, ereksheligi men ár alýan bolǵandyǵy sondaı, qorshaǵan álemge degen qýanyshty kózqarastary men qııaldary, oılary tańǵaldyrady. Atalǵan sharany balalardyń Táýelsizdik toıyna tartýy dep qabyldadyq, – deıdi kórme jetekshisi Gúlmaıra Ahatova.
200-den astam óner týyndysyn qamtyǵan aıryqsha kórme sáýir aıynyń sońyna deıin jalǵasady.
ALMATY
