21 Sáýir, 2021

Áskerı ushaqtyń apatqa ushyraý sebebi aıtyldy

49 ret kórsetildi

Qorǵanys mınıstrligi Qaraǵandy oblysynda apatqa ushyraǵan SÝ-30SM ushaǵynyń qulaý yqtımal sebebin aıtty, dep habarlaıdy egemen.kz

«Qaraǵandy oblysynda Sý-30SM ushaǵynyń apatqa ushyraý sebepterin tekserý jónindegi arnaıy komıssııa barlyq yqtımal nusqany qarastyryp jatyr. Solardyń biri-áskerı borttyń qustarǵa soqtyǵysýy. Qus soǵylǵan kezde qozǵaltqysh ajyratylady, al eger birneshe qus soǵylǵan bolsa eki birdeı qozǵaltqysh isten shyǵarylady. Avıasııada bul eń qaýipti jaǵdaı bolyp sanalady. О́ıtkeni ushaqtar qozǵaltqyshtardyń kem degende bireýi jumys istese, ushýyn jalǵastyrady jáne qaýipsiz qonady», dedi mınıstrlik ókilderi.

Qazirgi tańda áýejaılar men áskerı aerodromdar qustardy qorqytatyn qurylyǵlarmen jabdyqtalǵan. Bul úshin akýstıkalyq zeńbirekter,pırotehnıka jáne basqa da ádister qoldanylady. Dúnıejúzinde qustarǵa qatysty avıasııa máseleleri áli tolyqtaı sheshile qoıǵan joq. Sondyqtan qaqtyǵystar jıi oryn alyp turady. Statıstıkalyq málimetterge súıensek, álemde jylyna 5 myńnan asa áýe kemeleriniń qustarmen soqtyǵysý jaǵdaıy tirkeledi eken.

«Ushqyshtar ushaqty basqarý kezinde ómirine qaýip tóngenshe qoldan kelgenniń bárin jasady. Ushaq basqarylmaı kabına tútinge tolyp, turǵyndardyń ómirine qaýip tónbeıtinine, sonymen qatar jerdegi nysandar qıramaıtynyna kóz jetkizgende, ushqyshtar katapýlt sheshim qabyldady.

Ushqyshtar ushaqty sońyna deıin saqtap qalýǵa jáne ony áskerı bólimniń arnaıy qutqarý bólimsheleri ornalasqan áýeaılaqqa qondyrýǵa tyrysty», dedi mınıstrliktegiler.

Eske sala keteıik, 16 sáýirde Qaraǵandy oblysynyń Balqash qalasyndaǵy oqý avıasııalyq ortalyǵynda Sý-30SM kópfýnksıonaldy joıǵysh ushaǵy apatqa ushyraǵany habarlanǵan bolatynbyz.

Gaýhar QAPASh

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar