Qoǵam • 21 Sáýir, 2021

Jumyspen qamtý ortalyǵy kimderdi jumyspen qamtyp júr?

10 ret kórsetildi

«Nur-Sultan qalasy ákimdiginiń Halyqty jumyspen qamtý ortalyǵy» KMM dırektory Azamat Baıtasov ortalyqtyń atqaratyn qyzmeti, qysqa merzimdi kásiptik oqytý, «Eńbek» baǵdarlamasy, «Jastar praktıkasy» jaıly túsindirip ótti, dep habarlaıdy Egemen.kz qala ákimdiginiń resmı saıtyna silteme jasap.

«Qazirgi ýaqytta Jumyspen qamtý ortalyǵy «Eńbek» jáne «Jumyspen qamtý jol kartasy» baǵdarlamasy aıasynda qyzmet atqarady. «Eńbek» baǵdarlamasy aıasynda kásiptik oqytý, jańa bıznes ıdeıalardy júzege asyrýǵa memlekettik grant berý, sondaı-aq kásip negizderin oqytý, jastar praktıkasyna joldama berý, áleýmettik jumys oryndaryn qurý, qoǵamdyq jumystar, «Bastaý bızneske» joldamalar berý, sol sııaqty «Alǵashqy jumys orny» jobasy sekildi qyzmetter atqaryp jatyr», dedi Azamat Baıtasov.

Ol óz sózinde qysqa merzimdi kásiptik oqytý boıynsha 120 adam bilim alyp jatqanyn aıtty.

«Qazirgi ýaqytta jumyssyz azamattar jumys izdegen jaǵdaıda onyń mamandyǵy, jumys ótili bolmasa, biliktiligin joǵaltqan jaǵdaıda Jumyspen qamtý ortalyǵy ol azamatty kásiptik oqytýǵa jiberedi. Oqytý merzimi mamandyqqa baılanysty 1-3 aıǵa deıin sozylady. Oqý barysynda memleket tarapynan 21 787 teńge mólsherinde aı saıyn shákirtaqy tólenedi. Oqý aıaqtalǵannan keıin olardyń jumysqa ornalasýyna járdem beriledi. Bul qysqa merzimdi kásiptik oqytýymyz eńbek naryǵynda suranysqa ıe mamandyqtar boıynsha uıymdastyrylady. Qazirgi ýaqytta naýbaıshy, kondıter, baqylaýshy-kassır, kran-mashınıst, tehnık, elektrık mamandyqtary boıynsha qujat qabyldaý júrgizilip jatyr. Jospar boıynsha qysqa merzimdi oqytýmen 200 adam qamtylady. Al qazirgi ýaqytta 120 adam oqyp jatyr», dedi vedomstvo basshysy.

Sondaı-aq ol Nur-Sultanda 65 azamat «Eńbek» baǵdarlamasy arqyly memlekettik grant alǵanyn tilge tıek etti. Al jańa bıznes ıdeıalardy iske asyrýǵa arnalǵan memlekettik grant somasy – 200 AEK (583 400 teńge).

«Bul grantty alý úshin «Eńbek» baǵdarlamasy boıynsha qysqa merzimdi kásiptik oqytýdy bitirý qajet. Sol sııaqty «Kásipkerler palatasy» arqyly «Bastaý bıznes» jobasy boıynsha oqysańyz grantqa qujat tapsyra alasyz. Bul grant qarajatyn eńbek quraldaryna, tehnologııalyq jabdyqtarǵa, sondaı-aq kommersııalyq jyljymaıtyn múlikti jalǵa alý maqsatynda qoldanýǵa bolady. Jospar boıynsha 400 adam qamtylady. Qazir 65 grant alǵan azamat bar», dedi ol.

Onyń aıtýynsha «Jastar praktıkasy» arqyly 200-den asa azamat jumysqa ornalasqan.

«Jasy 29-ǵa tolmaǵan jas túlekter, oqýyn aıaqtaǵanyna úsh jyldan aspaǵan jáne jumys ótili joq azamattar osy baǵdarlamaǵa qatysa alady. Jumys uzaqtyǵy alty aıdan aspaıdy. Jalaqy mólsheri 94 myń teńge, qolǵa alatyny – 80 myń teńge. Jospar boıynsha 900 adam jumyspen qamtylady. Qazirgi ýaqytta 223 azamat osy baǵdarlama boıynsha jumysqa ornalastyryldy», - deıdi ol.

Vedomstvo basshysy óz sózinde «Qoǵamdyq jumystar» memlekettik baǵdarlamasy jaıly aıtty.

«Aldyn ala kásiptik daıarlaýdan ótýdi talap etpeıtin, paıdaly baǵyty bar, jumyssyz azamattar ýaqytsha jumyspen qamtylatyn bul baǵdarlamanyń uzaqtyǵy – 12 aı. Qazirgi ýaqytta jalaqynyń mólsheri eki tómengi aılyq mólsherinde kózdelgen, ıaǵnı 85 myń teńge», dedi ol.

Sonymen qatar «Alǵashqy jumys orny» jobasy jaıly málimet berip ótti.

«Bul – jastarǵa qajetti eńbek daǵdylaryn berý jáne alǵashqy jumys ornyna beıimdeý maqsatynda ashylǵan memlekettik baǵdarlama. Baǵdarlamanyń uzaqtyǵy – 24 aı. Jergilikti bıýdjetten beriletin sýbsıdııa kólemi – 20 AEK (58 myń teńge). Al jumys berýshi óz atynan taǵy qarajat qosa alady. Qazirgi ýaqytta bul joba jumys berýshilerden usynys qabyldap jatyr», dedi ol.

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar