Aımaqtar • 21 Sáýir, 2021

Qarshadaı balaǵa qanat bitirgen «Jas tulpar»

13 ret kórsetildi

Tobyl qalasynda Qostanaı oblysy oqýshylarynyń «Jas tulpar» atty dástúrli aıtysy ótti.

El Táýelsizdiginiń 30 jyldyǵyna jáne aǵartýshy Ybyraı Altynsarınniń 180 jyldyǵyna oraı oblystyq mádenıet basqar­masy­nyń qoldaýymen uıymdastyrylǵan oqýshylardyń jyr dodasynda Qostanaı, Rýdnyı, Jitiqara, Arqalyq qalalary men Beıimbet Maılın, Aman­geldi, Jangeldın, Qarabalyq aýdandarynyń jas daryndary baq synasty.

Aqyndar báıgesiniń qazylar alqasyna aıtystyń aqtańgeri Aıbek Qalıev tóraǵa­lyq etti. Ár óńirdiń úmitin úkilep kelgen kileń júırikterdiń jyr saıysy bastalar sátte sahnaǵa kóterilip, «Jas tulpardyń» tarıhyn bir sholyp ótken oblystyq máde­nıet basqarmasynyń basshysy alaman dúbirge eleńdep turǵan jas dúldúlderge barmaq­taı baq tilep, kópshilikke quttyqtaý sózin arnady.

– Bıyl 29-shy ret ótip otyrǵan «Jas tulpar» aqyndar aıtysy óńirdegi talaı talapker jasty úlken ónerge, úlken ómirge qanattandyrdy. «Jas tulpar» túletken jas aqyndardyń kóbi – búginde osy óńirge ǵana emes, elimizdiń ár túkpirinde óreli ónerimen, adal eńbegimen tanylyp, óziniń aqyndyq, azamattyq bıigine qol jetkizgen azamattar. Sonaý 1992 jyldan beri úzilmeı kele jatqan oqýshylar aıtysyn naǵyz óner mektebi dep baǵalaýǵa bolady. Kıeli táýelsizdigimizben tel túlegen búgingi aıtystyń tarıhyna kóz júgirter bolsaq, osy bir ıgi dástúrdiń basy-qasynda júrip, talaı jasqa qamqor bolyp, jol kórsetken belgili aqyn-satırık Ǵumar Ahmetchın aǵamyzdyń esimin umyt qaldyrýǵa bolmaıdy. Ol kisi «Jas tulpardyń» qazylar alqasynyń turaqty tóraǵasy, batagóı aqsaqaly bolyp edi, ókinishke qaraı byltyr aıyrylyp qaldyq. Búgingi jas tulparlardyń dúbirinen ol kisiniń de arýaǵy bir aýnap túsken bolar dep oılaımyn. Búgingi alamanda jas aqyndarymyzǵa sáttilik serik bolsyn, – dedi Erlan Qalmaqov.

Aıbek Qalıevtiń aıtýynsha, Qostanaı oblysyndaǵydaı 1994 jyldan beri dástúr­li túrde úzilmeı ótip kele jatqan oqýshylar aıtysy kóp oblystarda joq.

– Qazir oqýshylar aıtysy jalpy óńirlerde jıi óte bermeıdi. Meniń biletinim, Taldyqorǵanda ótetin Súıinbaıǵa arnalǵan respýblıkalyq oqýshylar aıtysy bar, keıde Uzynaǵashta ótedi, odan ózge ár óńirde anda-sanda mereıtoılarǵa oraı aıtystar ótip turady. Qostanaıdaǵy aıtys bıyl 29-shy ret uıymdastyrylyp otyr, bylaı qarasańyz, táýelsizdigimizben qurdas eken. «Jas tulpar» aıtysynan túlep ushqan túlekterdiń aldy respýblıkalyq alamandarda osy Tobyl-Torǵaı óńiriniń namysyn qorǵap júr. Tipti osy oblystyq mádenıet basqarmasyn basqaryp otyrǵan Erlan baýyrymyz da osy «Jas tulpardan» qanattanǵan. Sondyqtan aldaǵy ýaqytta bul aıtys úzilmeı jalǵasyn taba berýi kerek. Kelesi jyly oqýshylar aıtysynyń búgingi bıigine kóterilýine kóp eńbek sińir­gen Ǵumar Ahmetchın atamyzdyń atyna bir syı­lyq taǵaıyndalsa, artyq bolmas edi, – dedi Aıbek Qalıev.

Aıtystyń irikteý kezeńinde sóz saıys­tyrǵan 8 jup el táýelsizdigin jyrǵa qosyp, aǵartýshy Ybyraı atalarynyń eńbek joly men asyl murasyn dáriptedi. Birinshi kezeńde qara úzip shyqqan 3 jup tústen keıin fınaldyq kezeńde baq synasty.

«Jas tulpardyń» bas júldesin Arqalyq qalasynyń 5-synyp oqýshysy Nurıslam Raǵat jeńip aldy. Boıy dombyradaı ǵana qarshadaı bala buǵan deıin Arqalyqta ótken stýdentter aıtysynda júldeli úshinshi oryndy utyp alypty. Qarsylastarynyń eshbirine bet qaratpaǵan eń kishkentaı aqyn bul aıtysta eń bıik tuǵyrdan kórindi. Nurıslamnyń: «Juldyzdar qanshama kóp bolǵanymen, aı kórinip turady erekshe bop» nemese «Artyńda qalatyndaı sóz aıtsańshy, aıtysta bolam deseń shyn tuǵyrly», «Orystardyń mekeni emes seni, Arystardyń mekeni dep bilemin» dep kele­tin órnekke toly óreli órimderinen ónerpaz órenniń bolashaqta baǵyndyratyn belesteriniń bıik ekenin ańǵardyq.

Birinshi oryn Arqalyqtan kelgen Saıan Áýezhanǵa buıyrdy. Ekinshi orynnyń júldesin amangeldilik Nurlybek Tóleýov qanjyǵasyna bókterip, Rýdnyıdan kelgen Jambyl Toqqojaev úshinshi oryndy qanaǵat tutty. Júldeli oryndarǵa dıplomdar men aqshalaı syılyqtar tabys etildi. Marapattaý rásiminde sóz alǵan qazylar alqasynyń tóraǵasy Aıbek Qalıev sahnada qýyryp aıtpasa da, sýyryp aıtyp, sulý sóz saptasymen, aıshyqty oıymen kózge túsken, biraq júldege ilige almaı qalǵan 7 jas aqynǵa óz qaltasynan qarjylaı syılyq tabys etti.

 

Qostanaı oblysy,

Tobyl qalasy

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar