Rýhanııat • 21 Sáýir, 2021

«Sálemetsiz be, Baqtııar!»

742 ret kórsetildi

Taıaýda gazetimizdiń Qaraǵandy oblysyndaǵy tilshiler qosynyna múgedek balasy bar jalǵyzbasty ana habarlasyp, kómek surady. О́zi bes qabatty «hrýshevka» úıdiń joǵary páterinde turady eken: kóktemde qar erigende, jazda jańbyr jaýǵanda tóbeden sý sorǵalap aǵatyn kórinedi.

Kóp oılanyp jatpastan, áleýmettik jelini kúnde «shýlatyp» júrgen Baqtııar esimdi azamatqa habarlasýyna keńes berdim. Ertesine álgi áıel túsirgen beınearyz feısbýkte jarııalandy. Kóp uzamaı qalalyq máslıhattyń depýtattary, jergilikti atqarýshy bıliktiń ókilderi kelip, janaıqaı ıesiniń jaǵdaıymen tanysqan, kómek qolyn sozýǵa ýáde beripti...

Mine, joǵaryda esimi atalǵan Baqtııardy búginde Qaraǵandy tur­ǵyndarynyń basym kópshiligi tanıdy desek, shyndyqtan alys ket­peımiz. Búginde olardyń «Sálemet­siz be, Baqtııar!», dep bastalatyn aryz-shaǵymǵa toly jazbalary men beınerolıkteri feısbýk pen ıns­tagramnyń betin jaýlap alǵan. Bú­gingi kúnniń ashy shyndyǵy sol – kom­mýnaldyq keleńsizdikterden ábden qajyǵan jurt ákimdiktegilerdi emes, áleýmettik jelidegi osy azamatty izdeıtin boldy.

 Sonymen, Baqtııar Omarhanov degen kim?

– Baqtııar, siz ózińizdi kimmin dep sa­naı­syz: blogersiz be, atqarý­shy bı­­lik­ke oppozısııadaǵy adam­syz ba, álde ádiletsizdikpen jáne tár­tip­siz­dikpen kúresýshi belsendi­siz be?

– Bloger de jáne eshqandaı da at­qarýshy bılikke oppozısııalyq kózqarastaǵy adam da emespin. Tek qana ádilettilikti jaqtaýshymyn. Qandaı jumysta bolsań da adal bol, ótirik aıtpa, eshkimge qııanat jasama, álsizge kómektes. Mine, uıadan alǵan tárbıem – osy.

– Bir kezderi siz Qaraǵandy qa­lasy ákiminiń apparat basshysy bolyp qyzmet ettińiz. Qyzmettik mansapty jalǵastyrýǵa ne kedergi boldy?

– Ol qyzmetke jastaý kezimde, 27 jasymda keldim. Negizinde, ákem de ol mekemede qyzmet etý aýyr bo­la­tynyn aıtyp, qarsy bol­ǵan. Biraq sol kezdegi oblys ákimi Nur­mu­hambet Ábdibekov ózi qabyldap, usynys jasaǵan soń qarsy bolmadym. Test tapsyryp, konkýrsqa qaty­syp, qyzmetke turdym. Ol ju­mysqa deıin jeke kásipkerlikpen aına­lys­tym, oblystyq kásipkerlik bas­qarmasyn­da, «QazAgro» AQ-tyń oblystyq fılıalynda qyzmet at­qaryp, biraz tájirıbe jınaǵan edim. Qala ákimi apparatynyń basshysy laýazymy óte qyzyqty jumys edi. Biraq ártúr­li obektıvti-sýbektıvti sebeptermen qyzmetti jalǵastyrýǵa múmkindik bolmady da, óz erkimmen ótinish jazyp ketýge týra keldi.

– Ustanǵan pozısııańyz jergi­likti bılikke jaqpaıtyny belgili. Osy oraıda qýdalaý, qoqan-loqy kórgen jerińiz bar ma?

– Iá, jergilikti bılik unat­paı­dy, olardyń syndy aýyr qabyl­daı­tynyn bilemin. О́ıtkeni men olar­dy kóp maq­­tamaımyn ǵoı, tek tur­ǵynd­ardyń óti­nishteri boıynsha kem­shilikterin jarııa etýmen aına­lysamyn. Árıne keıde renish­terin jetkizip jatady.

– Ákimdik tarapynan qandaı reaksııa bolady? Múmkin olar sizdi qyzmetpen qyzyqtyryp, ózderine shaqyryp júrgen shyǵar?

 – Ákimdik tarapynan bolatyn reaksııalar ártúrli. Bólimder, aýdan ákimdikteri jyldam shara qoldanyp, jaýabyn berip jatady. «Jazǵandaryńdy alyp tastashy, oblys ákimdigi ursady» degendeı de ótinishter bolady. Negizi oblystyq deńgeıde, Qaraǵandynyń óz basynda aýyr qabyldaıdy. Jazǵandarymdy elemeýge tyrysady, jaýaptaryn da bere qoımaıdy, sharalar da keshteý qabyldanady. Árıne oblys ortalyǵynda halyq ta kóp, jumys ta bastan asady, burynnan qorda­lan­ǵan kemshilikter de jetedi, onyń bárin túsinemin. Meniń bar oıym sol prob­lemalardy der kezinde sheshýge kómektesý ǵana. О́kinishke qaraı, ony bireý durys qabyldasa, endi bireýler túsinbeı jatady. Al qyzmet týraly aıtsam, ázirge ákimdik tarapynan ondaı usynys túse qoıǵan joq. Tipti, birlesip jumys isteýge de nıet tanytqan emes.

– Sizdiń ákeńiz Nıqanbaı Omar­hanov uzaq jyldar boıy memle­kettik qyzmette boldy, oblysta bir­qatar aýdandy basqardy. Qazir­gi tirligińizge ákeńiz qalaı qaraıdy?

 – Asa quptamaıdy. El qatarly qyzmette bol, ádildik izdeseń júıeni ishinen túzetýge jumys iste degendi aıtady. «Jalǵyzdyń úni shyqpaıdy, jaıaýdyń shańy shyqpaıdy», dep men úshin alańdaıdy.

– Qaraǵandynyń kóptegen tur­ǵyn­y sizdi únemi izdeıdi. Buǵan ne sebep dep oılaısyz: olar at­qarý­shy bılikke senbeı me, ákimder jumysty durys uıymdas­tyra almaı ma, álde olar sizdi «qut­qarý­shy» keıpinde kórgisi kele me?

– Atqarýshy bılik kóp jaǵdaıda máseleniń aldyn alýda keshigip jú­redi. Kúndelikti aǵymdaǵy jumys­tar­men ketip qalady da, negizgi jumys­taryna úlgermeı jatady. Sosyn kemshilik oryn alǵanda ǵana «órt sóndirýshi» retinde jantalasady. Turǵyndar soǵan renjıdi, sosyn eriksiz biz sııaqty táýelsiz qoǵam bel­sendilerine shyǵady. Bul árıne durys emes! Ekinshi jaǵynan bar­lyq jaýapkershilik pen mindet at­qarýshy bıliktiń moınynda qalyp qoıady da, máslıhattar, depýtattar sııaqty ókiletti organdar ákimderdiń kóleńkesi sııaqty júredi. Halyqpen júıeli jumys istemeıdi, memleket tarapynan jergilikti bılikke kómek re­tinde qurylǵan qoǵamdyq keńes­terdiń róli joqqa tán. О́ıtkeni ol keńesterge ákimder ózderine qar­sy shyqpaıtyn adamdardy ǵana jınap, prınsıpshil azamattardy saılaǵylary kelmeı me degen oı keıingi kezde jıi keledi.

– Jalpy, siz kúnde aıtyp, kór­se­tip júrgen kemshilikterge kim kináli: ákimder me, nemquraıdy tur­ǵyndar ma, joq qazirgi qalyp­tasqan júıe me?

– Prezıdentimiz halyq únin estıtin memleket týraly únemi aıtyp, kadr máselesine qatty kóńil bólip júr. Bilimdi, jigerli jastardy bılikke tartyp, bılikti qoǵam tarapynan baqylaý týraly naqty tapsyrmalar berip, qalyptasqan júıeni ózgertý týraly kóp aıtyp jatyr ǵoı. Qoldaımyn.

– Blogty qoldaý úshin dep áleý­mettik jelilerde aqsha jınap jatyr ekensiz. Aqsha júrgen jerde qańqý sóz júredi, bul tirligińiz túbi ózińizge pále bolyp jabysady dep oılamaısyz ba?

– Bul máseleni belgili qoǵam bel­sen­dileriniń usynysymen taıaý arada ǵana qolǵa aldym. Sebebi turaqty jumysym joq, al eldiń aıtqan aryz-shaǵymyn arnaıy baryp, kózben kórý kerek. Jazǵandaryn óńdep, túze­tip, beınefoto montajdap, biraz ju­mys­tardy isteýge týra keledi. Mu­nyń bári ońaı emes. Oǵan ýaqyt kerek, júrip-turýyńa benzın kerek, kún­­kóristi de umytpaǵan jón. Bul jer­de men eshkimge aqsha tóle dep talap qoımaımyn, bul árkimniń jeke she­shimi jáne shotyma mardymdy qar­jy da túsip jatqan joq. Al negizgi nápa­qam­dy taksı qyzmetinen, ınstagramda jarnama, keńes berýden tabamyn.

– Osylaı júre beresiz be? Álde, alda jobalar men josparlar bar ma?

– Josparlar da, jobalar da kóp. Onyń qalaı bolaryn aldaǵy ómir kórsetedi.

– О́zińiz týraly, otbasyńyz ja­ıynda aıta ketseńiz...

 – Jasym 31-de. Úılengenmin, bir balam bar.

 

Áńgimelesken

Qaırat ÁBILDA,

«Egemen Qazaqstan»

 

QARAǴANDY

 

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar