Murajaı basshysy Sahan Tólenovtiń aıtýynsha, aıbyndy batyrdyń qanjary XVIII ǵasyrǵa tıesili, jasalýy da erekshe, tehnıkasy – metall, aǵash, quıma bolyp keledi. Uzyndyǵy – 45,6 sm quraıdy. «Taıjan aqsaqal – Tileýli batyrdan taraıdy. Sondyqtan qundy mura ol kisige arǵy atalarynan mıras bolyp qalypty», deıdi ol.
Tileýli Ábdirahmanuly – 1723 jyly Talas ózeni jáne Bulanty-Bileýti, Ańyraqaıda bolǵan jońǵarlarmen shaıqastarda qypshaq qolyn bastaǵan. Batyr týraly zańǵar jazýshy Ábish Kekilbaıuly: «Uzyn Qypshaq Tileýli Ábdirahmanuly jońǵar qalmaqtarymen bolǵan shaıqastardan keıingi beıbit kezeńde de bes qarýyn belinen sheshpegen. Bul – sol kezdegi batyrlardyń báriniń basynda bolǵan jaıttar. Ol Esetpen birge júrip, únemi eldiń mazasyn alyp, jıi jaýgershilikke ushyratyp otyrǵan quba qalmaqtarmen, bashqurttarmen, noǵaılarmen, túrikmendermen, orys-kazaktarymen shaıqasqan. Babalarymyzdyń sol qaısarlyǵy, erligi arqasynda Mańǵystaý túbegi, Jaıyq boıy máńgi ataqonysymyz bolyp qaldy» dep jazypty.
Babamyzdyń urpaqtary da ata dańqyna saı bolǵan. Batyrdyń kindiginen taraǵan bir uly, Abylaı hannyń bedeldi keńesshileriniń biri – Nııaz bı. Onyń zıraty elorda irgesindegi Taıtóbe aýylynda ornalasqan.Sonymen birge 1916 jylǵy Torǵaıdaǵy ult-azattyq kóterilis kósemderiniń biri Ábdiǵapar Janbosynuly da eren erdiń urpaǵy sanalady.
Tileýli babamyz Aqtóbe qalasynan 18 shaqyrym jerdegi Bestamaq degen eldi mekendegi Tama Eset batyrdyń janyna jerlengen.
