«Astana» kósh bastady

Eki kúnge jalǵasqan kezekti týr básekeleri ádettegideı tartysty ótti. Chempıondyq ataq úshin talasyp jatqan «Astana» elordada «Shahterdi» jeńip, týrnır kestesinde kósh bastasa, «Qaırat» syrt alańda «Atyraýdan» jeńilip, úzdikter qatarynan shyǵyp qaldy.

Jetinshi týrǵa josparlanǵan jeti matchqa jeke-jeke toqtalar bolsaq, týrdyń sensasııa­sy Atyraýda tirkeldi. Bıyl ǵana Birinshi lıgadan joǵary topqa oralǵan «Atyraý» óz alańynda byltyrǵy el chempıondary – Almatynyń «Qaıratyn» qabyldap, 1:0 esebimen jeńip ketti. Jergilikti «Munaıshy» stadıonynda ótken kezdesýde «Atyraý» oıynshylary qarsylastaryna qaraǵanda aıtarlyqtaı basymdyqqa ıe boldy dep aıta almaımyz. Tek ekinshi taımnyń alǵashqy mınýttaryndaǵy «Qaırattyń» qorǵanystaǵy qateligin tıimdi paıdalandy. Matchtaǵy jalǵyz ári jeńisti goldy «Atyraýdyń» jartylaı qorǵaýshysy Jaslan Qaıyrkenov soqty. Chempıonattaǵy tórt jeńilis, eki teń oıynnan keıingi alǵashqy jeńisine qol jetkizgen Aram Voskanıannyń shákirtteri týrnır kestesindegi jaǵdaıyn birshama jaqsartyp aldy. «Atyraý» oıynshylary keıingi týrlarda táýir óner kórsetip keledi. Aldymen óz jerinde «Jetisýmen» teń tússe (2:2), keıin syrt alańda «Qaısarmen» (1:1) upaı bólisti. Al jetinshi týrda sensasııa jasap, «Qaıratty» Almatyǵa upaısyz qaıtardy.

«Atyraý» – «Qaırat» arasyndaǵy matchtyń ssenarııine uqsas oıyn Aqtaýda «Kaspıı» men «Taraz» klýbtary arasynda ótti. Alty týrdan beri birde-bir oıynda jeńilmeı, týrnır kestesinde «Astanamen» birge top bastap kelgen «Tarazdyń» jeńisti serııasyna munaıly ólkede núkte qoıyldy. Oıyn taǵdyryn 30-mınýtta «Taraz» qaqpasyna belgilengen 11 metrlik aıyp doby sheship ketti. Bul múmkindikti múlt jibermegen «Kaspııdiń» jartylaı qorǵaýshysy Ýadjdı Salı komandasyna úsh upaı syılady.

Ázirshe óz alańyndaǵy oıyndardy elordadaǵy «Astana Arenada» ótki­zýge májbúr bolǵan Qaraǵandynyń «Shahteri» bul týrda stadıonnyń negizgi qojaıyndary – «Astanany» qabyldady. Chempıonattyń alǵashqy tórt týrynan keıin bapker aýystyryp, oıyn mánerin ózgertken «kenshiler» komandasyna bul ózgeris oń áserin tıgizip jatyr. Reseılik maman Magomed Adıev klýb tizginin ustaǵan alǵashqy oıynda «Shahter» syrt alańda «Aqtóbeni» 3:0 esebimen jeńse, keshegi týrda 1:0 esebimen «Astanadan» jeńildi. Oıyndaǵy jalǵyz goldy «Astananyń» jartylaı qorǵaýshysy Valerıı Chýperka soqty. «Shahter» fýtbolshylary esepti teńestirýge tyrysqanymen, qatarynan ekinshi oıynda jeńiske jetý baqyty buıyrmaǵan eken. Moldovalyq oıynshy chempıonattaǵy alǵashqy golyn soǵyp qana qoımaı, «Astanaǵa» týrnır kestesinde jeke-dara kósh bastaıtyn múmkindik syılady.

Bıylǵy Sýperkýbokty jeńip, maýsymdy tamasha bastaǵan Qostanaıdyń «Tobyly» týrnır debıýtanty – «Tu­ranmen» kezdesti. «Tobyl Arenada» ót­ken oıynda alań qojaıyndary Túr­kis­tan klýbynyń qaqpasyna jaýapsyz bes gol soǵyp, iri eseppen jeńiske jetti. Birinshi taımda Nemanıa Nıkolıch pen Azat Nurǵalıev mergendigimen kózge tússe, ekinshi taımda Nıkolıch dýbldiń avtory atandy. Sonymen qatar Dmıtrıı Mıroshnıchenko men qosalqy quramnan shyq­qan Jasulan Jumashev bir-bir gol soǵyp, oıynnyń núktesin qoıdy.

Altynshy týrda Taldyqorǵanǵa qo­naqqa baryp, «Jetisý» qaqpasyna tórt gol soqqan shymkenttik klýb áli de qaha­rynan qaıtpaǵanǵa uqsaıdy. Bul joly óz alańynda «Qaısar» klýbyn qabyldaǵan «Ordabasy» qarsylastar qaqpasyn tórt márte dál kózdedi. Kezdesýdiń esebin alań qojaıyndary ashqanymen, alǵashqy taımnyń sońyna deıin «qasqyrlar» eki gol soǵyp tarazy basyn ózderine aýdardy. Degenmen ekinshi taımda «Ordabasy» fýtbolshylary oıyn tizginin qoldaryna alyp, «Qaısar» qaqpasyna úsh gol soqty. Eki taımda bir-bir gol soqqan brazılııalyq shabýylshy Joao Paýlo dýbldiń avtory atansa, qorǵaýshy Tımýr Dosmaǵanbetov pen portýgalııalyq shabýylshy Rýben Brıdjıdý da qarsylastarynyń qaqpasyn bir márteden dál kózdedi. Aıtpaqshy, 2019 jyldan beri «Ordabasyda» oınap kele jatqan Joao Paýlo keshegi matchtan keıin klýb tarıhyndaǵy úzdik surmergen atandy – 33 gol.

Bir jyldyq úzilisten soń Premer-lıgaǵa qaıta oralǵan «Aqtóbe» eki týrdan beri jeńiske jete almaı keledi. Altynshy týrda óz alańynda «Shahterden» 3:0 esebi­men ońbaı jeńilgen Alekseı Baga shákirtteri bul týrda Oraldyń «Aq­jaıyq» klýbyna 1:0 esebimen jol berdi. «Aqtóbe» oıynnyń sózsiz favorıti bola tura, úsh upaıyn oljalaı almady. Al Petropavldyń «Qyzyljar» komandasy Taldyqorǵannyń «Jetisýyn» qabyldap, 3:0 nátıjesimen aıqyn jeńiske jetti.

Jetinshi týrdan keıin surmergender kóshin «Ordabasy» klýbynyń shabýylshysy Joao Paýlo bastady. Onyń enshisinde 6 gol bar. Al 4 goldan soqqan Abzal Beısebekov, Abat Aıymbetov, Marın Tomasov («Astana»), Kante («Qaırat»), Karolıs Laýkjemıs («Qaısar») jáne Pedrý Eýjenıý («Taraz») ekinshi oryndy bólisip tur.