«Banktiń qaýipsizdik qyzmetinenbiz» dep qońyraý shalǵan qaskóıler adamdarǵa bank shottarynda kúmándi áreketter jasaldy dep qorqytyp, aqshany saqtap qalý úshin basqa shotty ashý qajettigi týraly aıtqan. Jábirlenýshiler óz aqshalaryn alaıaqtardyń nusqaýymen alynǵan nesıeni atalǵan shotqa aýdarǵan, kelip túsken sms-habarlamalardan qupııasózder men kodtardy aıtyp, barlyq qarjysynan aırylyp qalǵan.
Taǵy bir fakti taýar men qyzmetterge aldyn ala tólem jasaýǵa baılanysty bolǵan. Al 38 jastaǵy petropavldyqtyń basynan ótken jaǵdaı, tipti, erekshe. «Telegram» messendjerindegi arnalardy qarap otyryp, ol «aqshany kóbeıtip beremin» degen «qyzmetke» tap bolady.
Er adam qaskóılermen hat almasyp, olarǵa 9 myń reseılik rýbl jiberedi, birneshe kúnnen keıin onyń qarjysy 15 myń rýblge jetkeni týraly habarlama kelip túsken. Alaıda, hat almasý kezinde qaskúnem aqshany alý úshin taǵy aqsha jiberýdi suraıdy. Ońaı oljaǵa qyzyqqan qalalyq qylmyskerge 17 myń rýbl jiberedi. Budan keıin qaskóı baılanysqa shyqpaı qoıǵan.
Alaıaqtyń qurbanyna aınalǵanyn túsingen er adam polısııaǵa júgingen. Keltirilgen shyǵyn somasy 157 myń teńgeni qurady. Atalǵan faktiler Qylmystyq kodekstiń «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Sotqa deıingi tergeý júrgizilip jatyr.
