Hattamaǵa sáıkes, M.Shoranov medısınalyq tekserýden ótip, dárigerdiń qorytyndysynan keıin egý kabınetine bardy. Reseılik Spýtnık V vaksınasynan aıyrmashylyǵy, bir QazVac qutysy bir adamǵa arnalǵan.
Vaksınasııadan keıin birinshi vıse-mınıstr 30 mınýt medısınalyq baqylaýda boldy.
«Búginnen bastap qazaqstandyq vaksına bizdiń azamattar úshin qoljetimdi. 50 myń dozadan turatyn birinshi partııasy óńirlerge jóneltildi. О́zderińiz biletindeı, buryn meniń áriptesterim Ajar Ǵınııat pen Erlan Qııasov Spýtnık V vaksınasyn birinshi bolyp saldyrǵan. Búgin biz densaýlyq saqtaý mınıstri Alekseı Vladımırovıchpen birge azamattarǵa preparattyń qaýipsiz ekenin kórsetý úshin otandyq óndiristiń vaksınasyn aldyq», dep atap ótti M.Shoranov.
Birinshi vıse-mınıstr ózin jaqsy sezinetinin aıtty.
Esterińizge sala keteıik, Memleket basshysynyń 2021 jylǵy 26 qańtardaǵy tapsyrmasyn oryndaý úshin halyqty jappaı vaksınasııalaýdy qamtamasyz etý úshin Bıologııalyq qaýipsizdik problemalary ǵylymı-zertteý ınstıtýty bazasynda qazaqstandyq COVID-19 vaksınasynyń alǵashqy partııasy QazCovid-in (QAZVAC) shyǵaryldy.
«SQ-Farmasııa» Biryńǵaı Dıstrıbıýtorynyń habtaryna 50 myń doza kóleminde otandyq vaksınanyń birinshi partııasyn jetkizý 23 sáýirde júzege asyryldy. Onyń ishinde 6 000 dozany Nur-Sultan men Almaty, 4 000 dozadan – Shymkent, Qaraǵandy, Shyǵys Qazaqstan jáne Almaty oblystary alady. Qalǵan óńirlerge eki myń dozadan túsedi.
Mınıstrdiń vaksına saldyrǵan sáti vedomstvonyń Facebook-tegi resmı paraqshasynda tikeleı efırde ótti.
