Preparat Almaty qalasy Qoǵamdyq densaýlyq basqarmasynyń qoımasyna tústi. Jalpy alǵanda Almatyǵa 6 myń doza (1 jáne 2 komponent boıynsha) berildi, olar QDB medısınalyq uıymdaryna bólinip berildi. Bul preparata 3 myń adamdy vaksınasııalaýǵa jetkilikti. Qala turǵyndarynyń qalaýy boıynsha qazaqstandyq nemese reseılik preparatty tańdaı alady.
QazCovid-in vaksınasyn QR Bilim jáne ǵylym mınıstrligi Ǵylym komıtetiniń Bıologııalyq qaýipsizdik problemalarynyń ǵylymı zertteý ınstıtýty ázirlegen. QAZ-COVID-IN – óli vırýstan jasalǵan vaksına. Bulshyq etke 0,5 ml/dozasy engiziledi.
Quramynda SARS-CoV-2 tazartylǵan ınaktıvırlengen tutas vırıondy shtamy bar. Ol hımııalyq reagentpen "óltirilgen" 2019-ncov vırýsyna negizdelip jasalynǵan. Mundaı vaksınalarda dene qyzýy kóterilmeıdi, qatersiz. Sondaı-aq Sputnik-V vaksınasy sııaqty eki komponentti jáne 21 kúndik ıntervalmen salynady.
Otandyq vaksınanyń artyqshylyqtarynyń biri – saqtaý sharttary. Eger Sputnik-V vaksınasy tońazytqyshta -18 gradýs temperatýrada saqtalsa, al QazVac vaksınasy 2-8 gradýs temperatýrada saqtalady. Bul preparatty óndirýshiden tutynýshylarǵa jetkizý logıstıkasyn jeńildetedi.
Klınıkalyq zertteýlerdiń birinshi kezeńine 18-65 jas aralyǵyndaǵy 44 erikti, ekinshi kezeńge – 200 adam, úshinshi kezeńge – 3 myń adam qatysty. Qazaqstan Dúnıejúzilik densaýlyq saqtaý uıymynyń reestrine óziniń kovıdke qarsy vaksınasyn tirkedi.
