Elimizde 1 aqpannan bastap vaksınalaý bastalǵany belgili. 23 sáýirdegi jaǵdaı boıynsha 823 498 adam birinshi komponentpen, 132 603 adam ekinshi komponentpen egildi. Immýndaý kýrsy 21 kúndik ıntervalmen eki kezeńnen turady.
Vaksına alǵan adamdardyń 0,4 paıyzynda bolýy múmkin reaksııalar tirkeldi. Bul týraly Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵynyń «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıaly dırektorynyń orynbasary Manar Smaǵul málim etti.
«Vaksınanyń birinshi komponentin saldyrǵan sozylmaly aýrýy bar adamdar sany 32 314-ke jetti. Vaksınalaýdyń tolyq kýrsyn (ekinshi komponentin) alǵan osy sanattaǵy sozylmaly aýrýy bar adamdardyń sany 8 397-ni qurady», dedi M. Smaǵul. Onyń aıtýynsha, 60 jastan asqan adamdardyń arasynda ımmýndaý kýrsyn 121 myńnan astam adam bastady jáne onyń tolyq komponentin 8 myńy aıaqtady.
«Qazirgi kezde ımmýndaýdan keıin kúrdeli qolaısyz belgiler tirkelmedi. Sonymen birge vaksına alǵan adamdardyń 0,4 paıyzynda bolýy múmkin reaksııalar tirkeldi, ıaǵnı temperatýra, ekpe jasaǵan jerdiń qyzarýy men aýyrsynýy sekildi jalpy belgiler baıqaldy», dedi M.Smaǵul.
Qoǵamdyq densaýlyq saqtaý ulttyq ortalyǵy basqarma tóraǵasynyń orynbasary Aınagúl Qýatbaeva medısına qyzmetkerleri QazVac vaksınasyn egý tártibimen jáne nusqaýlyqtarmen tanystyrylǵanyn tilge tıek etti.
«Medısınalyq uıymdarǵa jetkizý jaǵdaıyna qaraı 26 sáýirden bastaý josparlanyp otyr. Qazirgi kezde medısına qyzmetkerlerin nusqaýlyqpen tanystyrý júrip jatyr. Iаǵnı ekpeni salqyndatý rejimi, ony egý tártibi túsindirilip otyr», dedi A.Qýatbaeva.
О́z kezeginde M.Smaǵul qazirgi ýaqytta mınıstrlik óńirler boıynsha tıisti jumystardy pysyqtaǵanyn atap ótti.
«Halyqtyń ornalasý tyǵyzdyǵyna baılanysty 1 myńnan 3 myńǵa deıingi doza vaksına taratylady. Iаǵnı bul vaksına barlyq óńirde bolýy kerek. Erteńnen bastap keıbir óńirlerdiń medısınalyq uıymdary osy vaksınany alýy múmkin. Jalpy, dúısenbiden bastap vaksına tıisti medısınalyq uıymdarǵa taratylady», dedi M.Smaǵul.
Budan buryn habarlanǵandaı, jaqynda qazaqstandyq QazVac vaksınasynyń alǵashqy partııasy jóneltildi. QazVac vaksınasynyń alǵashqy 50 myń dozasy «SQ-Farmasııanyń» habtaryna taratylyp, odan ári elimizdiń barlyq óńirindegi densaýlyq saqtaý basqarmalarynyń qoımalaryna jetkiziletin bolady. Mamyr aıynda 50 myń doza kólemindegi vaksınanyń kezekti partııasyn shyǵarý josparlanýda. Budan ári vaksına óndirisi kezeń-kezeńmen aıyna 500-600 myń dozaǵa deıin ulǵaıtylady.
Jıyn barysynda mamandar júktilikti vaksınalaýdan keıin 2 aı ótken soń josparlaýǵa bolatynyn jetkizdi.
«Bul taqyryp kópti oılandyryp júrgeni belgili. Qazirgi kezde vaksınany alýdy nemese júktilikti josparlap otyrǵan áıelderdiń saýalyna toqtalsaq, júktilikti vaksınadan keıin 2 aı ótken soń josparlaýǵa bolady. Sebebi aǵzada tolyq ımmýnıtet qalyptasady. Eriktilerdiń arasynda júkti áıelderdiń bolmaýyna baılanysty bul vaksınanyń júkti áıelderdiń aǵzasynda qalaı júretini týraly ǵylymı málimetimiz joq. Soǵan baılanysty osyndaı sheshim qabyldanyp otyr», dedi A.Qýatbaeva.
Onyń aıtýynsha, ýaqyt óte kele ǵylymı jumystardyń nátıjesine baılanysty bul baǵyttaǵy tásilder ózgerýi múmkin.
