«Jambyl oblysynyń qylmystyq ister jónindegi mamandandyrylǵan aýdanaralyq soty aǵymdaǵy jyldyń 27 sáýirinde Qordaı aýdanyndaǵy jappaı tártipsizdik boıynsha úkim shyǵardy. О́tken jyldyń 7-8 aqpany aralyǵynda Jambyl oblysy Qordaı aýdany Masanshy, Bular-baty jáne Aýqatty aýyldarynda jappaı tártipsizdik oryn alyp, saldarynan 10 azamat qaza tapty, taǵy bir adam janyp jatqan ǵımaratqa qulap, kóz jumdy», dedi B. Qultasov.
Sottar ákimshisiniń basshysynyń aıtýynsha, 158 azamat pen 20 polısııa qyzmetkeri jaraqat alǵanyn jetkizdi. Jappaı tártipsizdik kesirinen 156 turǵyn úı men saýda nysandary, 102 avtokólik quraly búlinip, menshik ıelerine keltirilgen zalal 829 mln 848 myń teńge boldy. Jambyl oblysy Polısııa departamentiniń 10 avtokóligi zaqymdaldy. Memleketke 3 mln 291 myń teńge zalal keltirilgen.
Sonymen birge ol buǵan deıin sot úkimi boıynsha buzaqylyq árekettermen densaýlyqqa zııan keltirip, bılik ókilderine kúsh qoldanǵany úshin 6 adam sottalǵandyǵyn jetkizdi. Búgingi qylmystyq is 2020 jyldyń 8 jeltoqsanynan bıylǵy 19 sáýirge deıin júrgizildi. Oǵan eki prokýror, 366 jábirlenýshi jáne 16 jábirlenýshi ókili, 10 qorǵaýshy jáne 4 aýdarmashy qatysqan.
«Is boıynsha 51 adam aıyptalýshy retinde sotqa berilip, onyń ishinde 33-i qamaýda, 18 adam jeke kepildik jáne eshqaıda ketpeý qolhaty boıynsha ustalǵan. Sottalýshylarǵa aýyr jáne asa aýyr qylmystar jasady degen aıyptar taǵyldy. Sot zań men sot aldyndaǵy teńdik prınsıpin basshylyqqa alyp, jınalǵan dáleldeme men qylmystyq zańnamada kórsetilgen jaza aıasynda kelesi sheshimderdi shyǵardy: 50 adamdy kináli dep tanyp, bir adamnyń kinásiniń dáleldenbeýine baılanysty ony aqtady. Sottalýshylardyń kinálary molekýlıarlyq, sot-tergeý qorytyndylary men jasyryn beınebaqylaý dáleldemelerimen tolyq dáleldengen», dedi Sottar ákimshisiniń basshysy.
