Mınıstr arhıv ujymyna elimizdiń tarıhı, qujattyq murasyn saqtaýdaǵy, qazaqstandyq arhıv isine sińirgen úlken eńbekteri úshin alǵysyn bildirdi.
«Búgingi tańda arhıv salasyna úkimet tarapynan, mınıstrlik tarapynan úlken kóńil bólinip otyr. Jaqynda ózderińiz biletindeı Úkimet qaýlysymen arhıv salasyna basshylyq jasaý jónindegi ýákiletti organ retinde Qazaqstan Respýblıkasy Mádenıet jáne sport mınıstrliginiń Arhıv isteri jáne qujattamany basqarý komıteti quryldy. Bul da Memleket basshymyzdyń arhıv salasyna degen nazarynyń dáleli deýge bolady. Qazirgi tańda arhıv qyzmetkerleriniń jalaqysyn kóterý máselesi boıynsha jumys istep jatyrmyz jáne óz sheshimin tabady dep senemin», dedi vedomstvo basshysy.
Sonymen qatar respýblıka boıynsha arhıv qyzmetkerlerin baspanamen qamtamasyz etý de ózekti másele ekeni jáne bul baǵytta jumys júrgizilip jatqanyna erekshe toqtalyp ótti.
Ulttyq arhıv ujymyna aldaǵy qyzmetine sáttilik tileı otyra, jańa basshysy Saǵıla Nurlanovanyń memlekettik qyzmette uzaq jyldar boıy jınaqtaǵan tájirıbesi mol bilikti basqarýshy ekenin atap ótti.
О́z kezeginde Saǵıla Esimseıitqyzy Qazaqstannyń arhıv qyzmetkerleriniń muń muqtajyn bılikke jetkizip, onyń sheshimin tabýǵa úlken úlesin qosyp jatqan Qazaqstan Respýblıkasy Mádenıet jáne sport mınıstrligine jáne jeke Aqtoty Rahmetollaqyzyna 22 jeltoqsan Arhıvıster kúni bolyp belgilengeni jáne Úkimet qaýlysymen «Arhıv salasynyń úzdigi» degen tósbelgi taǵaıyndalýyna sala mamandary atynan alǵysyn bildirdi.
