Endi, mine, táýelsizdik alǵanymyzǵa tabany kúrekteı 30 jyl tolypty. 30 jyldyń ishinde eń bolmasa 30 eldi mekenniń ataýyn ózgerte almaı otyrmyz. Neden qorqyp, kimge jaltaqtap otyrǵanymyz belgisiz. Mysaly, Altynsarın aýdanynda irgeles otyrǵan Sılantev, Malaıa Chýrakovka, Bolshaıa Chýrakovka, Sherbakov, Pervomaı degen eldi mekender ataýynyń biri de ózgergen joq. Aýdan Altynsarın dep atalǵanymen, quramyndaǵy aýyldardyń deni ózge tilde atalady. Endi ne bir tarıhy, ne bir tegi joq maǵynasyz ataýlarmen qoshtasyp, jańa zamanǵa laıyq ataý qoıatyn nemese tarıhı ataýlardy qaıta jańǵyrtatyn kez keldi ǵoı. Men osy máseleni kóteremin dep ákimderge de jamanatty bolyp bittim. Aýdan ákimi, tipti sóılesýdi de qoıdy, kórgisi kelmeıdi, qashady menen. Barsam, kabınetine kire almaımyn. Ol kisiniń de qolynda turǵan eshteńe joq ekenin túsinemin, biraq el keleshegi úshin mańyzdy máseleni aıtý paryz.
Halqymyzda «Jalǵyzdyń úni shyqpaıdy, jaıaýdyń shańy shyqpaıdy» degen ataly sóz bar, osy oraıda kóp bolyp oılasyp, el táýelsizdiginiń 30 jyldyq qurmetine, ıá bolmasa, uly aǵartýshy Ybyraı atamyzdyń 180 jyldyǵyn eskere otyryp, Qostanaı oblysyndaǵy 30 eldi mekenniń tarıhı ataýyn qaıta jańǵyrtý týraly usynys aıtqym keledi. Bedeldi ǵalymdar men oblys, respýblıkadaǵy quzyrly oryndar jumylyp osy ıgi bastamaǵa qoldaý bildiredi dep senemin.
Naǵashybaı ALPYSOV,
jyrshy, zeınetker
Qostanaı oblysy,
Altynsarın aýdany
