Týrnırdiń jerebesi boıynsha «Qaırat» shırek fınalda Chempıondar lıgasynyń 2010 jylǵy jeńimpazy Portýgalııanyń «Benfıka» komandasymen kezdesip, osy jylǵy jarystyń shymyldyǵyn ashty. Tájirıbeli eki komanda arasyndaǵy matchtyń tartysty ótkeni sonshalyq, jeńimpaz komanda qosymsha taımda anyqtaldy. Birinshi taımnyń alǵashqy 15 mınýtyna deıin qarsylastar bir-biriniń qaqpasyna birneshe ret qaýipti shabýyl uıymdastyrǵanymen, gol soǵa almady. Tek 16-mınýtta qazaqstandyq klýb sapynan Gadeııa esep ashyp, mergendigimen kózge tústi. Degenmen jerlesterimizdiń qýanyshy uzaqqa sozylmady. «Benfıka» sapynan Jezýsh Afonsý jyldam qarymta gol salyp, tarazy basyn teńestirip ketti.
Matchtyń ekinshi kezeńinde qarsylas komanda oıynshylary belsendirek bolǵanymen, kezdesýdiń 30-mınýtynda Edson «Benfıka» qaqpasyn dál kózdep, «Qaıratty» qaıtadan esepte alǵa shyǵardy. Ekinshi goldan keıin jerlesterimiz qaqpashy aýystyrýǵa májbúr boldy. О́ıtkeni dopty qaıtaramyn dep abaısyzda qarsylas oıynshyǵa aıaǵy tıip ketken Igıtany tóreshi ekinshi sary qaǵazben jazalap, alańnan qýdy. Sóıtip alańnan ketken Igıtanyń ornyn 19 jastaǵy Narýn Serikov basty. Qaqpashy aýysqannan keıin psıhologııalyq basymdyqqa jáne eki mınýt bir oıynshyǵa artyq oınaǵan «Benfıka» qansha torýyldasa da, Serikovtiń sheberliginiń arqasynda qaqpaǵa gol soǵa almady. Degenmen oıynshy sany teńesken tusta portýgalııalyqtar báribir qaqpadan sańlaý taýyp, esepti taǵy da teńestirip ketti. Goldyń avtory – Tıagý Brıtý.
Negizgi kezeń 2:2 esebimen teń aıaqtalyp, oıyn 5 mınýttan eki overtaımǵa ulasty. Birinshi qosymsha kezeńniń sońǵy mınýtynda Dáýren Tursaǵulov komandasynyń úshinshi golyn soqsa, ekinshi overtaımnyń alǵashqy mınýtynda «Qaırat» sapynan Gadeııa penaltıdi sátti oryndap, dýbldiń avtory atandy. Araǵa úsh mınýt salyp Fernandıno esepti 5:2-ge jetkizse, matchtyń sońǵy mınýtynda Birjan Orazov oıynnyń núktesin qoıdy. Bul jerde Birjannyń úsh birdeı «Benfıka» oıynshysyn qapy qaldyryp, qaqpany dál kózdegenin aıta ketken jón. Osylaısha «Qaırat» 6:2 esebimen jeńiske jetip, jartylaı fınalǵa joldama aldy.
Endi jerlesterimiz erteń ótetin alǵashqy jartylaı fınalda Ispanııanyń azýly komandasy – «Barselonamen» kezdesedi. О́z kezeginde týrnırdiń dál qazirgi chempıondary shırek fınalda slovenııalyq «Doboves» klýbyn esh qıyndyqsyz 2:0 esebimen jeńdi. «Barselona» sapynan oıynnyń 9-mınýtynda Ferrao, 12-mınýtynda Aıkardo mergendik tanytty.
«Qaırat» pen «Barselona» arasyndaǵy match senbi kúni Nur-Sultan ýaqytymen 22:00-de bastalady. Jalpy ıspanııalyq klýbqa qarsy ótetin oıyn Kaka shákirtteri úshin ońaıǵa soqpaıyn dep tur. О́ıtkeni Chempıondar lıgasynyń fınaldyq kezeńinde eki komanda úsh márte kezdesip, úsheýinde de jerlesterimiz basym túsken. Atap aıtar bolsaq, Almatynyń klýby 2013 jáne 2015 jylǵy jartylaı fınalda Katalonııa komandasyn jarystan shyǵaryp jiberse, 2015 jyly Portýgalııada ótken týrnırdiń fınalynda «Qaırat» «Barselonany» 3:2 esebimen qapy qaldyryp, Chempıondar lıgasyn jeńip alǵan bolatyn. Endi mine, tórtinshi kezdesýde «Barselona» fýtzalshylary «Qaırattan» qalaıda ese qaıtarýdy kózdeıtini anyq. Biraq bizdiń jigitter qandaı jaǵdaıda da qarsylasqa jeńisti ońaı bere salmaıtynyn keshegi shırek fınaldaǵy oıyn dáleldep berdi.
Sondaı-aq keshegi shırek fınalda «Inter» (Ispanııa) – «Gazprom-Iýgra» (Reseı) jáne «Sportıng» (Portýgalııa) – KPRF (Reseı) komandalary kezdesti. Jartylaı fınal oıyndary 1 mamyrda, fınal básekesi 3 mamyrda ótedi dep josparlanǵan.
