Partııa hatshysy Álibek Áldeneıdiń aıtýynsha, «Baqytty otbasy» jobasy aıasynda ortalyq jáne jergilikti atqarýshy organdar keńestiń usynystaryn eskere otyryp, elimizdiń 220 eldi mekeninde ınternattar men mektepterde jóndeý jumystaryn júrgizý, medısınalyq-áleýmettik mekemelerde balalardyń kútim sapasyn jaqsartý boıynsha kóptegen jumystar júrgizilgen. Sonymen qatar 200 qyzmetker úshin bilim alý uıymdastyrylyp jáne jalaqy 50%-ke artty.
«Nur Otan» partııasynyń janynan qıyn jaǵdaıǵa tap bolǵan otbasylarǵa, áıelder men balalarǵa keshendi kómek kórsetý jáne olardy anyqtaý úshin «111 shuǵyl qyzmeti» baılanys ortalyǵy ashyldy. Ol elimizdiń barlyq óńirlerinde arnaıy qurylǵan jedel áreket etý toptarymen ózara birlese jumys jasaıdy.
Keńes tóraǵasy Dınara Zakıeva óńirlerde júrgizilgen taldaý jumystarynyń nátıjesinde, sol aımaqtarǵa otbasyn qoldaý ortalyqtarynyń sanyn arttyrý qajettigin kórsetetinin atap ótti. Atap aıtqanda, aýdan ortalyqtarynda otbasylarǵa, qıyn jaǵdaılarǵa tap bolǵan áıelderge, zorlyq-zombylyqqa ushyraǵan jandarǵa ýaqytyly kómek kórsetýdi qamtamasyz etý kerektigin aıtty.
«Jedel áreket etý toptary jumys istegen 10 aıdyń ishinde barlyq óńirde 46 myń otbasyǵa kómek kórsetilgen, onyń ishinde qujattardy resimdeý, jumysqa ornalastyrý jáne de basqada da keshendi kómekter qamtylǵan. Partııanyń saılaýaldy baǵdarlamasynda 5 jyl ishinde árbir qala men aýdanda otbasyn qoldaý, otbasylyq janjaldardy sheshý jáne balalary bar áıelderge ýaqytsha turǵynjaı usyný boıynsha osyndaı 234 ortalyq ashý mindeti kózdelgen», dedi Dınara Zakıeva.
Basqosý barysynda Keńes múshesi Dıana Erlan Bilim jáne ǵylym mınıstrliginiń ókilderine balalardyń ınternattarda turatyn jataqjaılary men bilim alý sapasyn jaqsartýǵa nazar aýdarý kerektigin aıtty.
Máselen, 2019 jyly Keńestiń jumys toby elimizdiń barlyq oblystaryndaǵy 61 ınternatqa baryp, olardyń 19-ynda sanıtarlyq normalar men sharttardyń buzylǵany anyqtalǵan. Eskertý alǵan barlyq ınternatta materıaldyq-tehnıkalyq baza nyǵaıtylyp, kúrdeli jóndeý jumystary júrgizildi. Alaıda elimizde 400-den astam jaqsartýdy qajet etetin ınternat bar.
Partııanyń baspasóz qyzmetiniń málimetinshe, ýákiletti organǵa 2021 jyldyń 1 shildesine deıin barlyq ınternattaǵy jaǵdaıdy jaqsartý jónindegi jumys kestesin Keńeske usyný tapsyrylǵan.
Otyrys qorytyndysy boıynsha atqarýshy organdarǵa birqatar usynystar daıyndalǵan. Olardyń arasynda Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń qaraýyna arnaıy mektepterden oralǵannan keıingi kámeletke tolmaǵandardy ońaltý, múgedek balalarǵa arnalǵan ońaltý ortalyqtarynyń sanyn ulǵaıtý jáne t. b. máselelerdi engizý týraly usynystar bar.
