«Qaırat» – «Barselona» matchy aldyndaǵy statıstıka boıynsha, almatylyq ujymnyń mereıi ústem bolyp tur edi. О́ıtkeni eki klýb arasyndaǵy keıingi úsh oıynnyń úsheýinde de Qazaqstan chempıondary qarsylastarynan basym túsken bolatyn. Biraq oıynshylardyń kúshi boıynsha «Barselona» jartylaı fınalǵa tas-túıin daıyn keldi. «Qaırat» klýby «Benfıkamen» ótken oıynǵa deıin-aq komandanyń eń mańyzdy degen eki oıynshysyna senim arta almaıtyny belgili bolǵan-dy. Máselen, rýmynııalyq qorǵaýshy Savıo Valadares jaraqatyna, al ekinshi qaqpashy Dýdý koronavırýs juqtyryp alýyna baılanysty almatylyq komandaǵa eki oıynda da kómektese almady. Sondaı-aq shırek fınal kezdesýinde qyzyl qaǵaz alyp, alańnan qýylǵan klýbtyń negizgi qaqpashysy ári kapıtany Igıta «Qaıratty» jartylaı fınal aldynda odan ári tyǵyryqqa tirep ketti. Onyń ornyn 19 jastaǵy jas qaqpashy Narýn Serikov joqtatpaýǵa tyrysqanymen, úlken jarystarǵa alǵash ret qatysyp turǵan Serikovke báribir tájirıbeniń jetispegeni anyq baıqalyp turdy.
Sóıtip match qarsańynda psıhologııalyq basymdyqqa ıe bolyp qana qoımaı, munyń aldyndaǵy úsh jeńilistiń esesin qaıtarý úshin urymtal sát ekenin sezingen «Barselona» «Qaıratty» jeńý úshin baryn saldy. Kezdesý biz kútkendeı katalonııalyqtardyń shabýylymen bastaldy. Oıynnyń kóp ýaqyty «Qaırat» qaqpasynyń mańynda ótkenimen, jerlestermiz qorǵanysta óte saýatty oıyn kórsetti. Degenmen tynymsyz shabýylynyń nátıjesinde «Barselona» oıynshylary matchtyń 15-mınýtynda báribir óz degenderine jetti. Qorǵaýshylardan ońaı sytylyp shyqqan «Barselona» shabýylshysy Ferrao esepti ashsa, araǵa bes mınýt salyp Ferraonyń ózi tablodaǵy kórsetkishti 2:0-ge jetkizdi.
Oıynnyń ekinshi taımynda «Qaırat» sapynan Dıego Favero esep aıyrmasyn qysqartqanymen, Ferrao taǵy da bizdiń qaqpadan sańlaý taýyp, het-trık avtory atandy. Match aıaqtalýyna sanaýly mınýttar qalǵanda almatylyqtardyń shabýylshysy Fernandıno esep aıyrmasyn 3:2-ge qysqartqanymen, tarazy basyn teńestirýge múmkindikteri jetpedi. Osylaısha bir dop aıyrmasymen jeńiske jetken «Barselona» óz tarıhynda «Qaırat» klýbynan tuńǵysh ret basym túsip, Chempıondar lıgasynyń fınalyna joldama aldy. Al almatylyq ujym bıylǵy básekeni jartylaı fınalda aıaqtaýǵa májbúr boldy.
Endi Ispanııanyń «Barselona» klýby fınalda Qazaqstan quramasynyń oıynshysy Taınan óner kórsetetin «Sportıng» komandasymen kezdesedi. Portýgalııa klýby jartylaı fınalda Ispanııanyń «Inter» klýbynan 5:2 esebimen basym túsken bolatyn. Sol oıynda Taınan da gol soǵyp, komandasynyń jeńiske jetýine súbeli úles qosty.
