Altyn Bank pen BI Group holdıngi ıpoteka rásimdeý prosesin birlesip sıfrlandyrý týraly kelisim jasasty. Altyn Bank basqarma tóraǵasynyń orynbasary Janar Aıqymbaevanyń aıtýynsha, klıentterdi ıdentıfıkasııalaý jumystary 2017 jyldan beri júrgizilgen.
– Bank – qadaǵalanatyn uıym, onyń ózindik prosesteri bar ekeni belgili. Biz bul prosesterdi barynsha jeńildetýge tyrystyq. Eń bastysy ónimdi alý klıent úshin yńǵaıly bolýy tıis. Bul bastama klıenttiń ýaqytyn ǵana emes, aqshasyn da únemdeıdi. Iаǵnı azamattar ıpotekany onlaın rásimdeý arqyly bank komıssııasyn tólemeıtin bolady, – deıdi bank ókili.
Ipotekany onlaın rásimdeýdi qalaǵan azamat aldymen BI Group saıtynda ótinish qaldyrady. Ol ótinish avtomatty túrde bankke jiberiledi. Banktiń oń sheshimi shyqqannan keıin klıent ESQ kilti arqyly qol qoıa alady. Alǵashqy tólemdi de bank kartasy arqyly tóleýge bolady.
Budan keıin memlekettik organdaǵy úlestik qatysý kelisimshartyn kútip, mobıldi qosymshada tirkeýden ótip, Altyn-y ESQ-qosymshasynyń kómegimen barlyq bank qujattaryna elektrondy túrde qol qoıý qajet. Osynyń bárin jıyp-tergende bes kún ýaqytty alady.
Baǵdarlama sharty boıynsha 12 aıǵa deıin 0,1 paıyzdan bastap nemese 20 jylǵa deıin 13,5 paıyzdan bastap nesıe rásimdeýge bolady. Eń joǵarǵy zaım somasy – 35 mln teńge.
