Elektrondy qujat menshik ıesiniń qalaýy boıynsha jańa jáne syrttan ákelingen jáne tirkelgen avtokólikterge rásimdeletin bolady. Osy kólik quraldaryn sıfrlandyrý onyń ómirlik sıklin elimizde ǵana emes, Eýrazııalyq ekonomıkalyq odaq aýmaǵynda da qadaǵalaýǵa múmkindik bermek.
Elektrondy pasporttarda kólik quralynyń tehnıkalyq sıpattamasy, menshik ıesi jóninde maǵlumattar, tirkeý týraly, alymdy kádege jaratý tólemderi jáne kedendik shekteýler men kedendik tazartý jóninde, sondaı-aq tehnıkalyq baıqaýdan ótkeni jaıyndaǵy málimetter bolady.
«Ulttyq aqparattyq tehnologııalar» AQ Basqarma tóraǵasy Rostıslav Konıashkınniń aıtýynsha, sıfrly qujat kólik quraldaryn satýdaǵy alaıaqtyq jaǵdaılar sanyn azaıtady. Osylaısha, qazirgi jáne bolashaq avtokólik ıeleri arasyndaǵy mámileniń qaýipsizdigi men ashyqtyǵyn qamtamasyz etedi.
– EAEO ortalyq bazasynda tekserý esebinen qaıtalanatyn VIN kodtardy anyqtaý múmkindigi paıda bolady. Bul halyqty problemaly avtomobılderdi satyp alýdan saqtandyrýǵa múmkindik beredi, – dep atap ótti ol.
Avtomobıldi paıdalaný kezinde kólik quralynyń pasporty ózekti kúıde bolady jáne kez kelgen ózgerister júıemen qadaǵalanbaq. Kólik quraly týraly shynaıy aqparattyń bolýy EAEO qatysýshy elderdiń búkil aýmaǵynda avtomobıldi satý nemese satyp alý prosesin neǵurlym qaýipsiz etedi. Aıta keter jaıt, joba EAEO elderi qol qoıǵan kólik quraly pasportynyń biryńǵaı nysandaryn engizý týraly kelisimdi iske asyrý sheńberinde júzege asyryldy.
