Pandemııany aýyzdyqtaý úshin vaksınasııa aýadaı qajet. Al ony ótkizýge qarajat qajet. Tek bıylǵy qajetti qarajattyń mólsheri 19 mlrd dollar ekenin aıtqan Gebreısýs osy aptanyń aıaǵynda kytaılyq eki vaksınaǵa qatysty sheshim shyǵyp qalatynyn, al reseılik «Spýtnık V» jaıynda maýsymnyń aıaǵynda nemese shildeniń basynda naqty uıǵarym qabyldanatynyn aıtty. Ázirge Dúnıejúzilik densaýlyq saqtaý uıymynyń ókili Marıandjela Sımaý sarapshylardyń «Spýtnık V»-di zerdelep jatqanyn jetkizip, «DSU ázirge Reseı tarapynan vaksınaǵa qatysty barlyq materıaldardy alyp bitken joq. Alaıda qujattar túsip jatyr. Reseıde DSU-nyń bir top mamandarynyń jumys istep jatqandaryna eki apta boldy. Olar 10 mamyrdan bastap «Spýtnık V» shyǵaratyn bes kásiporynǵa barýdy josparlap otyr. Sarapshylar jumysy aıaqtalyp, vaksına jan-jaqty zerdelenip bolǵan soń Uıymnyń sheshimi shyǵady» dedi.
Ulybrıtanııa birikken koroldiginiń burynǵy premer-mınıstri Gordon Braýn álemdegi baı memleketterdi SARS-CoV-2-ny jeńýde jumylýǵa shaqyryp, kedeı elderdiń halqy eger kómek bolmasa ózdikterinen vaksınasııadan óte almaıtynyn alǵa tartty.
«Ol úshin eki jyldyń ishinde 60 mlrd dollar jınap, baı memleketter janasharlyq tanytpasa, álemniń jiktelýi odan saıyn tereńdep, adamdar ómirine qaýip tónedi», degen eks premer-mınıstr.
