Pandemııa aýyrtpalyǵynyń birshama jumsarýy jáne vaksınalaýdyń qarqyndy júrýi ekonomıkanyń damýyna serpin bermek. «Azııanyń damý boljamy» (OPA) 2021» jyl saıynǵy ekonomıkalyq jarııalanymda 2021 jyly Qazaqstannyń ishki jalpy ónimi 3,2 paıyz deńgeıinde bolady delinedi. IJО́-niń mundaı deńgeıde bolýyna kóptegen qyzmettiń qaıtadan jumysyn bastaýy jáne shıkizat taýarlar óndirisi men baǵasynyń qaıta qalpyna kelýi áser etpek. Bank 2022 jyly kómirsýtek óndirisi men ınvestısııa kóleminiń artýy ekonomıkanyń 3,5 paıyz deńgeıinde ósýine yqpal etedi dep boljaıdy.
– Ǵylymı-zertteýler men ónertabystarǵa ınvestısııany kóbeıtý, qarjy júıesin, ásirese kapıtal naryǵyn nyǵaıtý, sondaı-aq bilim salasyna memlekettik shyǵyndardy ulǵaıtý ınnovasııanyń alǵa jyljýyna túrtki bolmaq. Bul óz kezeginde myqty ekonomıkalyq ósimdi qoldaýǵa septigin tıgizedi, – deıdi ADB Qazaqstandaǵy ókildiginiń dırektory Narıman Manapbekov.
«Elde ınnovasııalyq qyzmetterdiń shekteýli bolýy jáne shıkizattyq taýarlar eksportyna degen táýeldilik ekonomıkany osal etti. Bul daǵdarys Qazaqstanǵa ınnovasııany meılinshe yntalandyryp, sol arqyly ekonomıkalyq beriktiligin myǵym ete túsýge, COVID-19-dan soń qalpyna keltirýge bolatynyn kórsetti. 2008-2009 jyldardaǵy dúnıejúzilik qarjy daǵdarysynan soń jáne 2015 jyly munaı baǵasynyń kúrt quldyraýynan keıin Qazaqstan ekonomıkasy qaıta qalpyna keldi, biraq ósim prosesi baıaý júrdi.
2021 jyly óńdeýshi sektorǵa kórsetilgen memlekettik qoldaýdyń nátıjesinde ónerkásip kólemi 2 paıyzǵa ósim kórsetedi. Sonymen qatar shıkizattyq taýarlarǵa degen qaıta qalpyna kele bastaǵan álemdik suranysty qamtamasyz etý úshin paıdaly qazbalar óndirý kórsetkishiniń joǵarylaýy 2,8 paıyzǵa óspek. Karantın shekteýleriniń álsireýi transport, saýda jáne qoǵamdyq tamaqtaný sektorlarynyń qaıtadan qalpyna kelýine áser etedi. 2021 jyly qyzmet kórsetý sektory 3,8, al 2022 jyly 3,4 paıyzǵa ósim kórsetedi» delingen bank zertteýinde.
Zertteýdegi boljamǵa súıensek, bıyl qurylys sektory 9,4 paıyzǵa ósim kórsetip, memlekettik turǵyn úı jáne ınfraqurylymdyq damý qoldaý baǵdarlamalary arqyly 2022 jyly 6 paıyzǵa deıin ósedi. Al ınflıasııa ósimi bıyl 6,5 paıyzǵa deıin baıaýlaıdy. Eger keler jyly valıýta turaqtylyq tanytsa 6,2 paıyzǵa deıin tómendeýi múmkin. Negizgi taýarlar baǵasynyń baqylaýǵa alynýy jáne Ulttyq banktiń ınflıasııalyq targetteýge belsene aralasýy tamaq ónimderi baǵasynyń ósýin tejep, baǵany turaqtandyrýǵa kómegin tıgizedi dep jazylady bank boljamynda.
