General Panfılovtyń jıeni Alýa Baıqadamova ataıdyń shańyraǵyna arnaıy kelip quttyqtaǵan bolsa, Ulttyq ulannyń 5571 áskerı bóliminiń orkestri soǵys jyldaryndaǵy ánderdi tamyljyta oryndady. О́tkenge salaýat aıtqan eriktiler qaýymy da ıgi sharadan qalys qalmaı, jastyq jalynyn surapyl soǵysqa bergen jaýyngerge qurmet kórsetti. О́z kezeginde Qaıyrly Ýataıuly kópshilik qaýymǵa alǵysyn bildirip, maıdan dalasyndaǵy estelikterin bólisti.
«Men soǵysqa attanǵanda 20 jasta edim. Biz jaý áskerin Máskeýge 30 shaqyrym qalǵanda toqtattyq. Qarashanyń aıaǵy, jeltoqsannyń basynda qaıta qarsy shabýylǵa shyqtyq. Sodan fashıst armııasyn Máskeýden 150 shaqyrym qashyqtyqqa qýyp tastadyq. Bizdiń jeńiske jetýge degen rýhymyz kúshti boldy. Mundaı zobalańdy endi eshkimniń basyna bermesin», degen ardager jastarymyz osynaý beıbit ómirdiń qadirin bilse eken degen tilegin jetkizdi.
«Soǵys salǵan qandy qasiret talaılardyń armanyn tunshyqtyrdy. Talaı bozdaq tútinin de tútetip úlgere almastan, ómirimen qosh aıtysty. Shúkir, urpaǵymyz mamyrajaı zamanda tirshilik keship jatyr. Bul úlken baqyt. Basymyzdaǵy beıbit tańdy baǵalaıyq. El irgesi berik, táýelsizdigimiz baıandy bolsyn», dedi qarııa.
Qaıyrly Ýataıuly 1921 jyly 10 qyrkúıekte Shyǵys Qazaqstan oblysy Samar aýdanynda dúnıege kelgen. Eńbek jolyn 1940 jyly Shyǵys Qazaqstan oblysynyń Qulja orta mektebinde muǵalim bolyp bastaǵan ol 1941 jyly qazan aıynda Panfılov dıvızııasynyń 23-shi gvardııalyq polkine qyzyl ásker retinde alyndy. Ardager soǵysqa basynan aıaǵyna deıin qatysqan. Ol quramynda bolǵan 316-atqyshtar dıvızııasy 1941 jyly Almatyda quryldy. Aldymen 1941 jyly 16-armııa quramynda Máskeýdi qorǵaý soǵysyna qatysty. Panfılov basqarǵan dıvızııa soǵystaǵy erligi úshin 8-atqyshtar gvardııasy ataǵyn aldy. Qyzyl Tý, «Lenın» ordenderimen marapattaldy. Soǵystan keıin Samar aýdandyq atqarý komıtetinde bólim meńgerýshisi bolyp qyzmet istegen Qaıyrly qarııa ári qaraı aýdandyq tutynýshylar odaǵynda basshylyq laýazymdarda bolǵan. 1970-1983 jyldary Almatydaǵy qoǵamdyq tamaqtandyrý júıesinde sharýashylyq esep dırektory qyzmetin atqardy. 1983 jyly qurmet demalysyna shyqqan ardager bes bala tárbıelep ósirdi.
