Byltyr mamyrdyń 3-i «Astana» kásibı sport klýbynyń eks-dırektory Amanbek Kýlchıkovtiń mekemeniń quramyna kiretin Astana Pro Team velokomandasynyń jetekshisi Lázzat Shámshıevamen jáne Astana Motorsports jetekshisi Artýr Ardavıchýspen qylmystyq kelisim ázirlep, sony iske asyrǵan edi.
Tergeý barysynda Sybaılas jemqorlyqqa qarsy is-qımyl agenttigi seriktestik departamentiniń bas sarapshysy Symbat Israpýlova 2016-2018 jyldary Amanbek Kýlchıkov atalǵan klýbtardyń naqty qajettilikterin bile tura, qasaqana shyǵyndar kólemin birneshe esege artyq kórsetkenin málimdedi.
Bas sarapshynyń aıtýynsha, olar bul qarajatty maqsatty túrde jumsap, Shámshıeva jáne Ardavıchýstan jalǵan esepterdi qabyldaǵan da eken.
«Sheteldik kompanııalarmen jalǵan kelisimder jasaý jáne oqý-jattyqtyrý jıyndaryn uıymdastyrý, úı-jaılardy jalǵa alý, taýarlyq-materıaldyq qundylyqtar satyp alý boıynsha jalǵan aktilerge qol qoıý arqyly artyq bólingen aqshany jymqyrǵan. Mysaly, demeýshiler jyl saıyn kásibı jarysqa qatysýdyń barlyq álemdik standartyna saı keletin 200-den astam brend velosıpedterin tegin usynǵan», dedi bas sarapshy.
Oǵan qosa, klýbtyń basshylyǵy osydan 3 jyl buryn Almaty qalasynan avtoshına satýmen aınalysatyn otandyq kompanııalardyń birinen 6 brend velosıpedin jáne oǵan qosalqy bólshekter satyp alýǵa 219 myń eýro (94 mıllıon 48 myń 176 teńge) somasyna jalǵan kelisimshart jasalǵan.
Atalǵan málimdemelerge sáıkes prokýror barlyq sottalýshydan memlekettik jáne kommersııalyq uıymdarda basshylyq laýazymdardy atqarý quqyǵynan ómir boıyna aıyra otyryp, 8 jylǵa bas bostandyǵynan aıyrýdy surady.
Endi olarǵa 189-baptyń 4-bóligi, 2-tarmaǵy boıynsha múlki tárkilenip, belgili bir laýazymdardy atqarý quqyǵynan ómir boıyna aıyra otyryp, 7 jyldan 12 jylǵa deıingi merzimge bas bostandyǵynan aıyrý túrindegi jazany kózdeıdi.
Sot úkimi zańdy kúshine engen joq.
