Aıta ketsek, Qaraǵandy oblysynda «Ortalyq – Ońtústik» kólik dálizine kiretin Qaraǵandy – Balqash jáne Balqash – Býrylbaıtal jolynyń eki ýchaskesi qaıta jóndelýde.
QR Premer-mınıstriniń orynbasary Roman Sklıar Qaraǵandy oblysyna jumys sapary barysynda jol qurylysy barysymen tanysty. «Qaraǵandy – Balqash tas jolynda jumystar 50% bitti. О́tken eki jyl ishinde eń kólemdi jumys – negizdi daıyndaý júzege asyryldy. Qazir tórt jańa jolaq boıynsha qozǵalys ashylǵan ýchaskeler bar.
Sonymen qatar, jer tósemin tóseý jumystary júrgizilýde», dedi «QazAvtoJol» UK» AQ Qaraǵandy fılıalynyń dırektory Serik Aıdos. Uzyndyǵy 363 shaqyrym bolatyn Qaraǵandy-Balqash jolynyń qurylysy «Nurly jol» memlekettik baǵdarlamasy aıasynda júrip jatyr. Eki merdigerlik uıym jumys isteıdi – «QazGerStroı» BK» JShS jáne CITIC Construction Co., LTD. 9 asfaltbeton zaýyty jáne 10 usaqtaý-suryptaý kesheni jumyldyryldy. Oryndalatyn jumystardyń sapasyn jappaı tekserý úshin óndiristik bazalarda attestattalǵan alty jol zerthanasy jumys isteıdi. Qaıta qalypqa keltirý aıasynda 10 kópir, aýyl sharýashylyǵy tehnıkasyna arnalǵan 32 jol ótpesi, eki kólik aıryǵy jáne temirjol arqyly ótetin bir jol ótpesi qurylysy qarastyrylǵan. «Sondaı-aq, uzyndyǵy 150 shaqyrymdy quraıtyn Balqash – Býrylbaıtal jolynyń úsh ýchaskesinde jumystar júrip jatyr», dep tolyqtyrdy Serik Aıdos.
