Qasym-Jomart Toqaev osy normany zań júzinde bekitý týraly sheshimdi bıylǵy 25 aqpanda Ulttyq qoǵamdyq senim keńesiniń V otyrysynda jarııalaǵan bolatyn.
QR Prezıdentiniń kómekshisi Erlan Qarın Toqaev qol qoıǵan qujatqa qatysty pikir bildirdi.
«12 naýryzda Prezıdent tıisti zań jobasyn Parlamenttiń qaraýyna arnaıy joldaǵan edi. Bul – Prezıdenttiń zań shyǵarý bastamashylyǵy boıynsha ázirlengen alǵashqy zań jobasy. Sol arqyly Qasym-Jomart Toqaev aýyl sharýashylyǵy maqsatyndaǵy jerlerdi sheteldikterge satýǵa jáne jalǵa berýge tyıym salý týraly máseleni birjola sheshkisi keletinin naqty kórsetti», dep jazdy Erlan Qarın.
О́tken aptada zań jobasy Parlamentte egjeı-tegjeıli jáne jan-jaqty talqylanyp, depýtattar maquldaǵan soń, Memleket basshysyna qol qoıýǵa usynyldy.
«Is júzinde Prezıdenttiń jer týraly zańy aýyl sharýashylyǵy maqsatyndaǵy jerlerdi sheteldikterdiń satyp alýyna jáne jalǵa alýyna tosqaýyl qoıdy. Bul bıliktiń túrli daqpyrt pen qaýesetke bergen naqty jaýaby. Sondyqtan, osy másele boıynsha jurtty dúrbeleńge salýǵa budan bylaı esh negiz joqtyǵyna taǵy da basa nazar aýdarǵym keledi», dep pikir bildirdi Prezıdent kómekshisi.
