Onyń aıtýynsha, týrıstik naryqtyń qyzmetin odan ári yntalandyrý boıynsha zańnamalyq aktiler qabyldanyp, kórsetiletin qyzmetter jelisi ulǵaıtyldy. Infraqurylymdy damytý men ınvestısııalyq tartymdylyqty arttyrý úshin barlyq jaǵdaılar jasalýda.
«Búginde mádenıet, ádet-ǵuryppen dástúrlerdi nasıhattaýǵa baǵyttalǵan etno-týrızm erekshe ózektilik pen tanymaldylyqqa ıe. Osy baǵytta maýsym-qyrkúıek aılarynda Almaty qalasynyń týrıstik oryndarynda qolónershilerdiń qatysýymen «Uly dala murasy» jármeńkesin ótkizý josparlanyp otyr. Almaty qalasynda ulttyq taǵamdar men Qazaqstan halyqtarynyń taǵamdaryn tanymal etý maqsatynda «Kok bazar Fest», Aqtóbe oblysynda «Kóshpendiler (Nomad) murasy», Shyǵys Qazaqstan oblysynda BUQTYRMA FEST sııaqty ár óńirge tán festıvalderdi ótkizý kózdelgen. Kıeli týrızmdi damytýdy yntalandyrý jáne tarıhı-mádenı obektilerge týrıstik qyzyǵýshylyqty arttyrý maqsatynda 2021 jyldyń maýsym aıynyń sońyna deıin Qaraǵandy oblysynyń Ulytaý aýdanynda «Joshy han» tarıhı-mádenı keshenin ashý, shilde aıynda Shyǵys Qazaqstan oblysynda «Abaı jolymen» aqparattyq týry jáne taǵy basqa is-sharalar ótkiziledi», dedi vedomstvo basshysy.
Sonymen qatar Táýelsizdiktiń 30 jyldyǵyna oraı Qazaqstannyń qoldanystaǵy týrıstik ónimderiniń tizimin qalyptastyrý maqsatynda eldiń biregeı tarıhı-mádenı jáne tabıǵı kórikti jerlerin qamtıtyn 30 jańa transulttyq jáne óńirlik týrıstik ónimderdi ázirleý boıynsha joba iske asyrylady. Onyń qatarynda Uly Jibek joly boıynda transulttyq marshrýttardy qurý jáne Qazaqstannyń TOP-10 týrıstik destınasııasy bar.
«Ulttyq jáne halyqaralyq deńgeıde elimizdiń týrıstik áleýetin odan ári ilgeriletý maqsatynda Qazaqstannyń 30 týrıstik ónimderiniń katalogy qurylady. Qazaqstannyń týrıstik múmkindikteri men áleýetin sheteldik aýdıtorııaǵa tanystyrý maqsatynda Almaty qalasyna álemniń 30 elinen kelgen 150 jýrnalıstiń qatysýymen halyqaralyq shańǵyshy Jýrnalıster klýbynyń (SCIJ) jyl saıynǵy kezdesýi uıymdastyrylady. Týrızm salasynda josparlanǵan 30 zákirli ınvestısııalyq jobany iske asyrý josparlanyp otyr», dedi mınıstr.
