55 adam «Tártipsizdik uıymdastyrý jáne qatysý» jáne «Bılik ókiline qatysty zorlyq-zombylyq qoldaný» baptary boıynsha aıyptalǵan.
Qaraǵandy oblysy kámeletke tolmaǵandar isi jónindegi mamandandyrylǵan aýdanaralyq sotynyń sýdıasy Kenjebaı Ysqaqbaev búgin sot úkimin jarııa etti.
Úkimge sáıkes, 9 sottalýshyǵa 3 jylǵa bas bostandyǵynan aıyrý jazasy taǵaıyndaldy, ony olar ortasha jáne tótenshe qaýipsiz QAJ mekemesinde óteıdi. Sot 44 sottalýshyny tórt jylǵa shartty túrde bas bostandyǵynan aıyrdy. Taǵy ekeýin shartty túrde bir jarym jylǵa sottady. Belgili bolǵandaı, sottalǵandar jergilikti polısııa bólimi men pedofıldiń kórshilerine kelgen materıaldyq zalaldy ótegen.
Tártip saqshylarynyń avtokólikterine keltirilgen zalal 26 mıllıon teńgeni qurady. Esterińizge sala keteıik, ótken jyldyń 23 shildesinde Sátbaev qalasynda 5 jasar bala joǵalyp ketken bolatyn. Qyz bala 62 jastaǵy kúdiktiniń páterinen tabyldy.
Balanyń urlanǵany jaıly jańalyqty estigen ondaǵan qala turǵyny kúdiktiniń úıine baryp, ony óz betinshe jazalamaq bolǵan. Saldarynan qalada jappaı tártipsizdikter oryn aldy.
