Elbasy júzege asyrǵan «Júz jańa esim» jobasy el ishinde nebir óner tarlandaryn, tehnıkanyń tilin meńgergen jas talapkerlerdiń esimin áıgilep keledi. Zaman-ýaqyty aldynda eńbegi eleýli, kózqarasy bólek, tanymy tereń, tańdaýly talanttardyń shoǵyryn qalyptastyrdy. Jyl saıyn dástúrli túrde tabıǵat bergen tumsa talantpen tańǵajaıyp týyndy jasaýǵa beıil, bilimi jetik jastar jetilip keledi. Olardyń óz isine adaldyǵyn ańdaǵanda, ultqa degen jańashyrlyǵynan taǵan tartqan qaraketin kórgende kóńilimizdi qýanysh kerneıdi. Biregeı jobanyń nátıjesinde qanshama jastyń aty-jóni asqaqtap, eńbegi janýda. Olar eldiń erteńin, zııaly qaýymnyń jańa kelbetin qalyptastyratyn býyn dep senemiz.
Talant jeke-dara alǵanda ilýde bir kezdesetin kenish, ony kók bolattaı sýaryp, sary altyndaı súzip otyrmasa, ıakı el bolyp qudiretine boılamasa, tot basyp ketýi ǵajap emes. Sondyqtan daryndy kózdiń qarashyǵyndaı, boıtumardaı saqtaý qajet. Ondaıda ómir atty uly ustazdan sabaq alyp, aqyl atty sheber zergerdiń qamqor qolyna baryp qonsa deısiń.
Árıne, el táýelsizdiginiń otyz jyldyq tarıhynda kók týymyzdy kókke kótergen nebir sańlaqtarymyz ben óner maıtalmandarymyz shyqty. Alaıda sol tuǵyrǵa qonǵan talanttardyń taǵdyry qalaı órildi? Olımp shyńyn baǵyndyryp, ánuranymyzdy álemge tyńdatqan sportshylar baǵasyn baǵamdap, qazaqtyń daýysyna, dara únine tórtkúl dúnıeni bas ıdirgen dúldúlderimizdi qaı deńgeıde ardaqtap jatyrmyz? Mundaıda jalǵan dúnıeden jasyndaı jarq etip óte shyqqan Erik Qurmanǵalıev, Bekzat Sattarhanov sııaqty esimder tizbegi kóz aldyńnan óte beredi.
О́zin ózi durys ıgere almaǵan, jóndi júgendeı almaǵan jas talanttar basyn taýǵa da soǵady, tasqa da soǵady. Ony bireýler basqa qonǵan baqytty kótere almady dese, endi biri baqastyqtyń qurbany boldy dep biledi. Tulaboıdy kernegen tumsa kúsh, aǵyl-tegil ystyq qaıratty arnaıy bir arnaǵa salǵandyqtan talanttar keıde turmys-tirshiliktiń daǵdyly qalybyna syımaı qalýy múmkin. Tabıǵat tartqan dara-qasıettiń ulttyń bolmys-bitimimen jymdastyra almasa, oǵan talant qana emes, qaýmalaǵan qaýym da kináli.
Talantty qazanatqa mingizetin de, aǵash atqa mingizetin de halyq. Batyr ańǵal keledi degen bátýaly sóz bar. Ádemi áńgime aıtýǵa ebi joq el súıingen sportshy suhbat barysynda sózden súrinse, áleýmettik jelide ájýalaý úrdis alyp barady. Bir kezderi japa-tarmaǵaı maqtaǵan qoshemetshil jurt jabyla dattaýǵa kóshedi. Kúshten jyǵylmaǵan qazaqtyń balasy sózden jyǵylsa, ult úshin istegen kól-kósir eńbegin ekinshi qatarǵa qoıa salatynymyz ábestik emes pe? Dúıim dúnıe júzine ortaq sańlaqtarymyzdyń jeke bastaryna tán kinárat-kemshilik bolsa, búgip qalyp, nege abyroıyn saqtamasqa. О́ıtkeni jas urpaqqa onyń jasyǵy emes, asyly, kemistigi emes, jetistigi qajet.
Qabilet pen qasıet qatar qonbaýy múmkin. Arǵy-berginiń bárin birdeı aqyl tarazysyna salyp, dál bezbendep otyratyn salıqaly, kóldeneń ótkinshi qubylystardyń qaqpaqylyna qaıyspaı qarsy tura alatyn salmaqty, maqtaý-madaqtaý ataýlyǵa aldanyp-arbalyp ketpeıtin parasatty talanttar sırek kezdesedi. Egemen eldiń topyraǵynan ushqan darynnyń bári ádebıetke jaqyn, ata-ájeniń tárbıesin kórgen, oń-solyn tanyǵan, ózge elde ózin erkin ustaı alatyn Dımash emes. Máselen, túrki jurtynyń ishinde tuńǵysh ret ataqty Gremmı syılyǵynyń ıegeri atanǵan Imanbek baýyrymyzdy ózge eldiń prodıýserleri ıemdenip ketti. Qarapaıym qazaq balasynyń erligine Eýropa tańdaı qaqsa, Azııa áli sene alar emes. Taıaýda tanymal telearnalardyń belgili jýrnalısteri baǵdarlamalaryna shaqyryp, jıyrma jastaǵy jigitke shymshyma saýaldar tastap, jigerin jasytqanyn baıqadyq. Al eldiń dańqyn shyǵarǵan sol Imanbekti memleket aıryqsha qaraýyna alyp, tereń mýzykalyq bilim berse, jas jigittiń shyǵar bıigi áli alda emes pe? Balań jigit jazataıym súrinip ketse, obaly kimge? Sondyqtan óz talanttaryn baǵalaý ǵana emes, saqtaý da búgingi úlken mindet bolsa kerek.
Daryn – uly dalamyzda baǵzy balalardyń qanymen úzilmeı jetken danalyqtyń dáni. Qasıet halyqtyń quty bolsa, memleket sony saqtaıtyn syrtqy qaýyzy emes pe? Endeshe bizdiń basty baılyǵymyz arda azamattarymyz desek, darynymyzdy baptaı bileıik, barymyzdy saqtaı bileıik.
